اسكەرگە بارۋدان قاشقان دەنى ساۋ ازاماتتار ەندى ءبىر جىلعا دەيىن باس بوستاندىعىنان ايىرىلىپ، 2 ميلليون تەڭگە ايىپپۇل تولەۋى مۇمكىن. بۇل تۋرالى بۇگىن كۇزگى شاقىرۋعا قاتىستى باسپا ءسوز ءماسليحاتىندا قارۋلى كۇشتەر باس شتابى تاربيە جانە يدەولوگيالىق جۇمىستار دەپارتامەنتىنىڭ باسشىسى ءمۇسلىم دايىروۆ مالىمدەدى دەپ جازادى Qamshy.kz اقپارات اگەنتتىگى.

قازاقستان ارمياسىنىڭ قاتارىنا جاڭادان 16 مىڭ سارباز قوسىلادى. ەكىنشى قىركۇيەكتەن باستاپ ەلىمىزدە 18 بەن 27 جاس ارالىعىنداعى ازاماتتاردى اسكەر قاتارىنا شاقىرۋ باستالدى. «ءقازىر ازاماتتىق بورىشىن وتەۋگە ىنتالى جاستار كوپ»، – دەيدى ماماندار.

جالپى مەرزىمدى اسكەر قاتارىنا 120 مىڭ ەر ازامات شاقىرتۋ الادى. سونىڭ 80 پايىزى اسكەرگە جارامدى جاندار. تەك 10 پايىزى عانا دەنساۋلىعىنا بايلانىستى اسكەرگە جارامسىز. ال قالعان ون پايىزى ۋاقىتشا ەم قابىلداپ جۇرگەندەر دەپ سانالادى.