ءماجىلىس ءتوراعاسى نۇرلان نىعماتۋلين بۇگىن پولشا پرەزيدەنتى اندجەي دۋدامەن كەزدەستى، دەپ حابارلايدى Qamshy.kz اقپارات اگەنتتىگى پارلامەنت ءماجىلىسىنىڭ باسپا ءسوز قىزمەتىنە سىلتەمە جاساپ.

مارتەبەلى مەيمان ءبىزدىڭ ەلىمىزگە ەلباسىنىڭ ارنايى شاقىرۋىمەن كەلدى. ءماجىلىس سپيكەرى اتاپ وتكەندەي، پولشا پرەزيدەنتىنىڭ بۇل جولعى ساپارى ءوزارا ىنتىماقتاستىقتى تەرەڭدەتۋگە تىڭ سەرپىن بەرەتىن بولادى.

پولشا قازاقستاننىڭ ورتالىق جانە شىعىس ەۋروپاداعى ماڭىزدى ساياسي جانە ەكونوميكالىق ارىپتەسى بولىپ تابىلادى. بيىل ەكى ەل اراسىندا ديپلوماتيالىق قارىم-قاتىناستىڭ ورناعانىنا 25 جىل تولدى. وسى ۋاقىتتار ارالىعىندا قوس مەملەكەت اراسىندا سىندارلى بايلانىس ورناپ، ول جىل سايىن تەرەڭدەپ كەلەدى.

ن. نىعماتۋلين قازاقستان پرەزيدەنتى نۇرسۇلتان نازاربايەۆتىڭ وتكەن جىلعى پولشا ەلىنە رەسمي ساپارى مەملەكەتتەر اراسىنداعى ساۋدا-ەكونوميكالىق بايلانىستى نىعايتۋعا ىقپال ەتكەنىن العا تارتا كەلىپ، ەكونوميكالىق ىنتىماقتاستىق تۋرالى قابىلدانعان پرەزيدەنتتەر دەكلاراسياسىنىڭ ناتيجەسىندە 845 ملن. اقش دوللارىن قۇرايتىن 15 ينۆەستيسيالىق جوباعا قول قويىلعانىن اتاپ ءوتتى.

تاراپتار بارلىق سالادا ىقپالداستىقتى كۇشەيتۋ جولدارىن اڭگىمەلەي كەلىپ، اسىرەسە، قوس مەملەكەتتىڭ ترانزيتتىك مۇمكىندىگىنە ايرىقشا نازار اۋداردى. كەزدەسۋ بارىسىندا ەكسپو حالىقارالىق كورمەسىنىڭ ماڭىزىنا دا ەرەكشە كوڭىل ءبولىندى.

ال پارلامەنتارالىق ىنتىماقتاستىق جايىنا كەلگەندە ن. نىعماتۋلين قازاقستاندىق پارلامەنت وكىلدەرى ەكى مەملەكەت پرەزيدەنتتەرى اراسىندا قول جەتكىزىلگەن بارلىق كەلىسىمدەردى زاڭدىق تۇرعىدان قولداۋعا دايىن ەكەندىگىن جەتكىزدى.