بۇگىن ەكسپو-2017 حالىقارالىق مامانداندىرىلعان كورمەسى اياسىندا بىرىككەن اراب امىرلىكتەرىنىڭ ۇلتتىق كۇنى اتاپ ءوتىلدى. مەملەكەت جاڭارتىلاتىن ەنەرگيا كوزدەرى سالاسىنداعى ءبىرقاتار جوبالاردى قولداۋ جانە قارجىلاندىرۋ ارقىلى تاجىريبەسىمەن ءبولىستى. بۇل تۇرعىدا مەملەكەتتىڭ تىنىق مۇحيت سەرىكتەستىك قورى، ابۋ-دابي دامۋ قورى جانە جاڭارتىلاتىن ەنەرگيا كوزدەرى جونىندەگى حالىقارالىق اگەنتتىكپەن (IRENA) ىنتىماقتاستىعى ءباا-نىڭ حالىقارالىق دەڭگەيدەگى بەدەلىن جانە ەكولوگيالىق تازا ەنەرگيا سالاسىنداعى شەشىمدەردى دايىنداۋداعى ۇلەسىن كورسەتەدى. بۇل تۋرالى ۇلتتىق كۇندى مەرەكەلەۋ بارىسىندا ءباا ۇلتتىق بۇقارالىق اقپارات قۇرالدارى كەڭەسىنىڭ باس ديرەكتورى مانسۋرا ال مانسۋري مالىمدەدى، دەپ حابارلايدى Qamshy.kz اقپارات اگەنتتىگى ەكسپو-2017 كورمەسنىڭ مەديا-ورتالىعىنا سىلتەمە جاساپ.
جيىننىڭ رەسمي بولىگىندە ءسوز سويلەگەن مانسۋرا ال مانسۋري بىرىككەن اراب امىرلىكتەرىنىڭ ەكسپو-2017 كورمەسىنە قاتىسۋى بولاشاق ەنەرگەتيكا سالاسىن قالىپتاستىرۋداعى، سونداي-اق «بولاشاق ەنەرگياسى» تاقىرىبىنداعى وزگە ەلدەردىڭ وزىق تاجىريبەلەرىن، نەگىزگى تەندەنسيالارى مەن تەحنولوگيالارىن زەرتتەۋ سالاسىنداعى ەلدىڭ ۇلەسىن كورسەتۋگە بىرەگەي مۇمكىندىك بەرگەندىگىن اتاپ ءوتتى.
«ەكسپو-2017 كورمەسى جاڭارتىلاتىن ەنەرگيانى، جاسىل ەكونوميكانى دامىتۋ ماڭىزدىلىعىن سونداي-اق اتالعان باعىت بويىنشا جاڭا تەحنولوگيالاردى ەنگىزۋ قاجەتتىلىگىن كورسەتتى. بۇل بالامالى ەنەرگيا كوزدەرىنە ەرەكشە كوڭىل بولىنگەن ءباا-نىڭ ەنەرگەتيكالىق رەسۋرستاردى ارتۇرلەندىرۋ بويىنشا ستراتەگياسىندا كورىنىس تاپتى. اتالعان ستراتەگيا كۇن، سۋ جانە جەل سياقتى ەنەرگيا كوزدەرىنىڭ قولايلى بالانسىن قۇرۋعا باعىتتالعان. اتقارىلعان جۇمىس ناتيجەسىندە جاڭارتىلاتىن ەنەرگيا كوزدەرى جونىندەگى حالىقارالىق اگەنتتىگىنىڭ شتاب-پاتەرى ءباا استاناسى ابۋ-دابيدا قۇرىلدى»، - دەپ قورىتىندىلادى مانسۋرا ال مانسۋري.
ءوز كەزەگىندە قازاقستان رەسپۋبليكاسى ينۆەستيسيالار جانە دامۋ ءمينيسترىنىڭ ورىنباسارى تيمۋر توقابايەۆ ەكسپو-2017 كورمەسى جاسىل تەحنولورگيالار، مادەنيەتتى دامىتۋ جانە قورشاعان ورتانى قورعاۋ سالالارىنداعى جەتىستىكتەردى ۇسىنۋ ءۇشىن تاماشا مۇمكىندىك ەكەندىگىن اتاپ ءوتتى. سونداي-اق، تيمۋر توقابايەۆ ەكى ەل 25 جىل ارلىعىندا ەنەرگەتيكا سالاسى جانە باسقا دا كوپتەگەن باعىتتار بويىنشا ءوزارا تىعىز قارىم-قاتىناس ورناتقانىن ەسكەرىپ ءوتتى. سوڭعى جىلدارى ەكى ەل اراسىنداعى ساياسي جانە ساۋدا-ەكونوميكالىق ىنتىماقتاستىق بەلسەندى دامىپ كەلەدى.
«حالىقارالىق قارجى ورتالىعىن ەكسپو اۋماعىندا قۇرۋ بارىسىندا دۋبايدىڭ تاجىريبەسى وتە ماڭىزدى بولدى. ناتيجەسىندە بىرىككەن اراب امىرلىكتەرى ينۆەستورلارى ءۇشىن دە جاڭا مۇمكىندىكتەرگە جول اشىلادى جانە ءباا ازاماتتارى ءۇشىن قولدانىستاعى ۆيزاسىز رەجيم بارلىق باعىتتار بويىنشا ىنتىماقتاستىقتى دامىتۋعا ىقپالىن تيگىزەدى»، - دەدى تيمۋر توقابايەۆ.
بىرىككەن اراب امىرلىكتەرى دامىعان ەلدەر قاتارىنداعى گەرمانيا، فرانسيا، اقش جانە اۋستراليامەن بىرگە جاڭارتىلاتىن ەنەرگيا كوزدەرى جونىندەگى كەڭەسكە مۇشە. ءباا ۇلتتىق پاۆيلونى كليماتتى باقىلاۋ سالاسىنداعى شەشىمدەردى جانە ەنەرگەتيكا سالاسىنداعى نەگىزگى جاھاندىق باستامالاردى ۇسىنادى. سونداي-اق بولاشاقتا ۇلتتىڭ دامۋى مەن وركەندەۋىنە ىقپال ەتەتىن ءبىرقاتار زەرتتەۋ جوبالارى مەن جوسپارلارى كورسەتىلگەن.
