6 قىركۇيەكتە مەملەكەت باسشىسى قازاقستان-پولشا بيزنەس-فورۋمىنا قاتىستى، دەپ حابارلايدى Qamshy.kz اقپارات اگەنتتىگى.

اقوردانىڭ مالىمەتىنە سۇيەنسەك، فورمۋعا ەكى ەل بيزنەسىنىڭ 450-دەن استام وكىلى قاتىستى. قازاقستان پرەزيدەنتى جيىنعا قاتىسۋشىلار الدىندا سويلەگەن سوزىندە ەلدەرىمىزدىڭ ساۋدا-ەكونوميكا سالاسىنداعى ىنتىماقتاستىعىن دامىتۋدىڭ ماڭىزدىلىعىن ايتىپ، بۇل قارىم-قاتىناستى كەڭەيتۋگە الەۋەتىمىزدىڭ جەتكىلىكتى ەكەنىن اتاپ ءوتتى.

مەملەكەت باسشىسى قولايلى ينۆەستيسيالىق احۋالدى قالىپتاستىرۋ ءۇشىن قازاقستاندا قابىلدانىپ جاتقان شارالارعا جانە ونىڭ ناتيجەلەرىنە توقتالدى.

– پولشا ازاماتتارى قازاقستاندا ۆيزالىق تالاپتاردان بوساتىلعان. شاعىن جانە ورتا بيزنەستى، ماشينا جاساۋ جانە اۋىل شارۋاشىلىعىن دامىتۋ جونىندە جۇمىس توپتارى قۇرىلدى. ەلدەرىمىز اراسىندا جۇمىس ىستەپ جاتقان ۇكىمەتارالىق كوميسسيانىڭ ءرولى ماڭىزدى، – دەدى قازاقستان پرەزيدەنتى.

سونىمەن قاتار، نۇرسۇلتان نازاربايەۆ ەلىمىزدىڭ جاڭا ەكونوميكالىق «جىبەك جولى» قۇرىلىسىنا قاتىسۋى جونىندە ايتىپ، ەكىجاقتى ەكونوميكالىق ىنتىماقتاستىق اياسىندا ىسكە اسىرىلىپ جاتقان قازاقستان-پولشا جوبالارىنا توقتالدى.

– «پولفارما» فارماسيەۆتيكالىق كومپانياسى تابىستى سەرىكتەستىكتىڭ جارقىن مىسالى سانالادى. «استانا – جاڭا قالا» ارنايى ەكونوميكالىق ايماعىندا «سەلەنا گرۋپپ» كومپانياسى قۇرىلىس ماتەريالدارىن شىعاراتىن جوبانى ىسكە اسىردى. «قازتەحماش» زاۋىتى «پرونار» پولياك تەحنولوگياسىن قولدانا وتىرىپ، پەتروپاۆلدا اۋىل شارۋاشىلىعى تەحنيكالارىن جاساۋعا كىرىستى. جالپى، قازاقستاندا پولياك كاپيتالىنىڭ قاتىسۋىمەن 115 كاسىپورىن جۇمىس ىستەۋدە، – دەدى مەملەكەت باسشىسى.

نۇرسۇلتان نازاربايەۆ ەكونوميكالىق قارىم-قاتىناستى ودان ءارى دامىتۋعا مۇددەلىلىك تانىتىپ، قازاقستاندا الداعى كەزەڭدە بيزنەس جۇرگىزۋگە سەبەپ بولاتىن ءبىرقاتار ماسەلەنى اتاپ ءوتتى.

– پرەزيدەنت جانىندا شەتەلدىك ينۆەستورلاردىڭ كەڭەسى جۇمىس ىستەيدى. 61 ەلدىڭ ازاماتتارى ءۇشىن ۆيزاسىز رەجىم ەنگىزىلگەن. 10 ارنايى ەكونوميكالىق ايماق پەن 20-عا جۋىق يندۋستريالىق ايماق جۇمىس ىستەۋدە. مەملەكەت وسى ايماقتاردىڭ جۇمىسىنا قاتىسۋشىلاردى قاجەتتى ينفراقۇرىلىممەن قامتاماسىز ەتىپ وتىر. ولارعا سالىق جەڭىلدىكتەرى مەن ارتىقشىلىقتار بەرىلگەن. بۇدان بولەك، جەر قويناۋىن پايدالانۋعا ليسەنزيا الۋ جانە شارتقا وتىرۋ ءتارتىبى جەڭىلدەتىلدى، – دەدى قازاقستان پرەزيدەنتى.

سونداي-اق، مەملەكەت باسشىسى پولياك بيزنەسمەندەرىن ەلىمىزدەگى كاسىپورىنداردىڭ اكتيۆتەرىن جەكەشەلەندىرۋگە قاتىستىرۋ ارقىلى ىنتىماقتاستىقتى نىعايتۋ جانە اگرارلىق سەكتوردا قارىم-قاتىناس ورناتۋ مۇمكىندىكتەرىنە توقتالدى.

نۇرسۇلتان نازاربايەۆ قازاقستاننىڭ جەدەلدەتىلگەن جاڭعىرۋ ۇدەرىسى ەكونوميكالىق بايلانىستاردى كەڭەيتۋدىڭ قوسىمشا مۇمكىندىگى بولىپ سانالاتىنىن ايتتى.

– ءبىز ىسكەرلىك تۋريزمنەن ەكولوگيالىق جانە رۋحاني تۋريزمگە دەيىنگى ءتۋريزمنىڭ بارلىق ءتۇرىن دامىتۋعا زور ءمان بەرەمىز. تىكەلەي اۋە قاتىناسىنىڭ ورناعانىن ەسكەرىپ، ءوزارا ىنتىماقتاسۋعا جانە تۋريستىك ونىمدەردى ىلگەرىلەتۋگە مۇددەلىمىز. «ەكسپو» كورمەسى اياقتالعان سوڭ ونىڭ بازاسىندا «استانا» حالىقارالىق قارجى ورتالىعى جۇمىسىن باستايدى. سونداي-اق، «ەكسپو» بازاسىندا جاسىل تەحنولوگيالار مەن ينۆەستيسيالاردى دامىتۋ جونىندەگى حالىقارالىق ورتالىق جۇمىس ىستەيتىن بولادى، – دەدى نۇرسۇلتان نازاربايەۆ.

سوڭىندا قازاقستان پرەزيدەنتى بيزنەستى دامىتۋ جانە ءوزارا ءتيىمدى سەرىكتەستىكتى نىعايتۋ ءۇشىن بيزنەسمەندەردى بارلىق مۇمكىندىكتى پايدالانۋعا شاقىردى.