كۇندە سوڭعى 12 جىلدا العاش رەت قاتتى جارقىل ورىن الدى. ول ەڭ ۇلكەن ەكى كۇن داقتارىنىڭ قوسىلۋ ناتيجەسىندە پايدا بولعان، دەپ حابارلايدى Qamshy.kz اقپارات اگەنتتىگى. بۇل جايىندا لەبەديەۆ اتىنداعى ران ينستيتۋتىنىڭ كۇننىڭ رەنتگەندىك استرونومياسى لابوراتيا قىزمەتكەرلەرى مالىمدەدى.

«مۇنداي قۋات تەك كۇندە عانا بولادى جانە دە ول وتە سيرەك، بىرەگەي جاعدايلاردا كۇن بەلسەندىلىگىنىڭ شىڭىندا قالىپتاسادى. بەلگىلى بولعانداي، مۇنداي قاتتى دەڭگەيدەگى جارقىل كۇن مينيمۋمى اياسىندا پايدا بولدى، عالىمدار ءالى ءبىرشاما زەرتتەۋلەر جۇرگىزىپ، انىق-قانىعىنا جەتۋى ءتيىس»، - دەيدى استرونومدار.

رەنتگەندىك قۋاتىنا بايلانىستى كۇن رادياسياسىنىڭ جارقىلى بەس كلاسقا بولىنەدى: ا، ۆ، س، م جانە دە ح. ەڭ تومەنگى كلاسس ا0.0 بولىپ تابىلادى، ونىڭ قۋاتى جەر وربيتاسىندا شارشى مەترگە 10 نانوۆاتتىڭ ساۋلەلەنۋ قۋاتىنا سايكەس كەلەدى. كەلەسى ارىپكە اۋىسقاندا قۋات 10 ەسەگە ارتىپ وتىرادى.

كەشە كۇندە ورىن العان جارقىل ح كلاسسىنا ءتان جانە دە وعان ح9.3 دەگەن بالل بەرىلدى. عالىمداردىڭ ايتۋىنشا، جارقىل كۇننىڭ جەرگە قاراپ تۇرعان بەتىندە ورىن العان، سول سەبەپتى دە ونىڭ جەر پلانەتاسىنا اسەرى كوبىرەك بولادى. بۇل قۇبىلىستىڭ اسەرى جەرگە، عارىشكەرلەرگە جانە وربيتاداعى سپۋتنيكتەرگە قالاي بولاتىنى بەلگىسىز، سوندىقتان دا ول جايىندا قانداي دا ءبىر بولجام ايتۋ ازىرگە مۇمكىن ەمەس.

مامانداردىڭ ايتۋىنشا، كۇن بەلسەندىلىگىنىڭ دارەجەسى ون باللدىق شكالادان اسىپ، 10.3 باللعا جەتتى.