پاۆلودار قالاسىندا جانتۇرشىگەرلىك جول اپاتى ورىن الدى. ەكى وقۋشى قىز ترامۆايدىڭ استىندا قالىپ، سالدارىنان بىرەۋى كوز جۇمدى، دەپ حابارلايدى Qamshy.kz  اقپارات اگەنتتىگى وڭىرلىك باسپا ءسوز قىزمەتىنە سىلتەمە جاساپ.

بۇل جايىندا جەرگىلىكتى اگەنتتىككە وقيعا كۋاگەرلەرى حابار بەرگەن. جانتۇرشىگەرلىك جول اپاتىنىڭ سۋرەتتەرى ينستاگرام جەلىسىندەگى @tipavlo پاراقشاسىندا جاريالاندى.

«وقيعا بۇگىن تاڭعى 7:43 شاماسىندا ورىن العان. 2007 جانە 2009 جىلعى ەكى قىزدى لوموۆ پەن كاتايەۆ كوشەسىندەگى قيىلىستا ترامۆاي باسىپ كەتكەن. وكىنىشكە وراي، قىزداردىڭ بىرەۋى وقيعا ورنىندا قازا تاپتى، ال ەكىنشىسى قازىرگى ۋاقىتتا اۋرۋحانادا رەانيماسيا بولىمىندە جاتىر. جاعدايى تىم اۋىر»، - دەيدى وڭىرلىك دەنساۋلىق ساقتاۋ باسقارماسىنىڭ باسشىسى نۇرلان ورازالين.

پاۆلودار ترامۆاي باسقارماسىنىڭ باسپا ءسوز قىزمەتىنىڭ حابارلاۋىنشا، ترامۆاي اليۋمين زاۋىتىنا قاراي كەتىپ بارا جاتقان. رولدە جۇرگىزۋشىلىك تاجىريبەسى 5 جىل بولعان 1987 جىلعى قىز وتىرىپتى.