بۇگىن ەحرو – 2017 حالىقارالىق كورمەسى الاڭىندا ق ر پرەمەر-مينيسترىنىڭ ورىنباسارى – اۋىل شارۋاشىلىعى ءمينيسترى ا.مىرزاحمەتوۆتىڭ دۇنيەجۇزىلىك جابايى تابيعات قورىنىڭ باس ديرەكتورى م.لامبەرتيني مەن WWF رەسەي ديرەكتورى ي.چەستينمەن كەزدەسۋى بولىپ ءوتتى، دەپ حابارلايدى Qamshy.kz اقپارات اگەنتتىگى ق ر اشم باسپا ءسوز قىزمەتىنە سىلتەمە جاساپ.

كەزدەسۋ بارىسىندا اۋىل شارۋاشىلىعى مينيسترلىگى مەن دۇنيەجۇزىلىك جابايى تابيعات قورى اراسىندا جولبارىستاردى قازاقستانعا قايتا جەرسىندىرۋ باعدارلاماسىن ىسكە اسىرۋ تۋرالى مەموراندۋمعا قول قويىلدى.

«قازاقستان دامۋدىڭ «جاسىل» جولىمەن ءجۇرىپ كەلەدى. جولبارىستاردى تاريحي جەرىنە قايتارۋعا بايلانىستى وسىنداي ماڭىزدى جوبانى الەم بويىنشا العاشقى بوپ قازاق ەلىنىڭ قولعا الۋى ۇلكەن ابىروي. سونداي-اق، باعدارلاما ارقىلى ىلە-بالقاش ايماعىنىڭ ەكوجۇيەسى تولىعىمەن قالپىنا كەلتىرىلەتىنى دە وتە ماڭىزدى»، – دەپ ايتىپ ءوتتى ا.مىرزاحمەتوۆ.

ايتا كەتەيىك. 2014 جىلى مامىر ايىندا الماتى قالاسىندا قازاقستاندىق جانە حالىقارالىق ساراپشىلار قاتىسقان سەميناردا ىلە وزەنىنىڭ اۋماعى جولبارىستاردى جەرسىندىرۋگە جارامدى ەكەنى دالەلدەنگەن بولاتىن.

وسى ماقساتتاردى جۇزەگە اسىرۋ جولىندا ارنايى باعدارلاما ازىرلەنىپ، نازاربايەۆ ۋنيۆەرسيتەتىندە وتكەن قازاقستان ۇلتتىق گەوگرافيالىق قوعامى وتىرىسىنىڭ اياسىندا تانىستىرىلدى.
اتالعان باعدارلاما دۇنيە جۇزىندەگى جولبارىستاردىڭ سانىن 2022 جىلعا قاراي ەكى ەسەگە ارتتىرۋعا ءوز ۇلەسىن قوسادى.

بۇدان بولەك باعدارلاماعا جابايى تابيعاتتى ساقتاۋ جانە تۇياقتى جانۋارلار (قۇلان، توعاي بۇعىسى) پوپۋلياسياسىن ساقتاپ قالۋ شارالارى ەنگىزىلگەن.

وسىنىڭ نەگىزىندە اۋىل شارۋاشىلىعى مينيسترلىگى 2018 جىلدان باستاپ «ىلە-بالقاش» تابيعي رەزەرۆاتىن قۇرۋ تۋرالى شەشىم شىعاردى.

«ىلە-بالقاش» ەكو جۇيەسىن قايتا قالپىنا كەلتىرۋ كەلەشەك ۇرپاق ءۇشىن بالقاش وزەنىن ساقتاپ قالۋعا مۇمكىندىك بەرەدى.