ورتالىق كوممۋنيكاسيالار قىزمەتىندە ۇەۇ-نىڭ اتقارىلعان ىستەرى مەن الداعى جوسپارلارى تالقىلاندى. باسپا ءسوز جيىندا ەلىمىزدە 1،5 جىلدان بەرى قىزمەت اتقارىپ كەلە جاتقان قوعامدىق كەڭەستىڭ قۇرىلىمى تۋرالى ايتىلىپ، قاراشا ايىنا جوسپارلانعان استانادا وتەتىن رەسپۋبليكالىق ءماجىلىسى بەلگىلەندى، دەپ حابارلايدى Qamshy.kz.    

بۇل تۋرالى ق ر ءدىن ىستەرى جانە ازاماتتىق قوعام ۆيسە-مينيسترى ابزال نۇكەنوۆ جانە ازاماتتىق قوعام ىستەرى كوميتەتىنىڭ ءتورايىمى ءاليا عالىموۆا جۋرناليستەرمەن كەزدەسۋ بارىسىندا مالىمدەدى. «مەملەكەت پەن ۇەۇ ءوزارا ارەكەتتەستىگى: قازىرگى جاعدايى مەن كەلەشەگى» اتتى باسپا ءسوز كونفەرەنسيادا اتالعان مينيسترلىك تاراپىنان اتقارىلعان ىستەر تۋرالى ايتىلدى. 

- قوعامدىق كەڭەستەر ءوزارا قارىم-قاتىناستىڭ ءتيىمدى مەحانيزمى بولىپ قالىپتاسۋدا. ولاردىڭ قۇقىقتىق بازاسىن جەتىلدىرۋ ءۇشىن ءبىز بارلىق 229 قوعامدىق كەڭەستىڭ، ۇەۇ جانە حالىقارالىق ۇيىمداردىڭ ۇسىنىستارىن جيناقتادىق. ولاردىڭ نەگىزىندە مينيسترلىكپەن قوعامدىق كەڭەستەر تۋرالى تيپتىك قاعيدا جوباسى دايىندالدى، وندا قوعامدىق كەڭەستەر جۇمىسىنىڭ ۇردىستەرى، سونىڭ ىشىندە قۇرامدى قالىپتاستىرۋ، وتىرىستاردى وتكىزۋ، شەشىمدەردى باقىلاۋ ۇردىستەرى ەگجەي-تەگجەيلى كورسەتىلگەن. سونىمەن قوسا، بيىلعى جىلى قاراشادا قوعامدىق كەڭەستەردىڭ العاشقى رەسپۋبليكالىق ءماجىلىسى وتەدى. ءبىز وندا زاڭناماعا ەنگىزۋ ءۇشىن دايىندالعان بارلىق تولىقتىرۋلاردى ۇسىناتىن بولامىز، - دەدى ۆيسە-مينيستر ابزال نۇكەنوۆ.

ەندى ۇەۇ ءوزارا ارەكەتتەستىگى ناتيجەسىندە ءوزىن قارجىلاندىرۋدىڭ جاڭا مەحانيزمدەرىنە كوشەدى. ياعني، گرانتتار مەن پرەميالار ەنگىزىلدى. بيىل العاش رەت ۇەۇ-عا سىيلىقاقى تاعايىنداۋ ءۇشىن كونكۋرس وتكىزىلىپ جاتىر (سىيلىقاقى مولشەرى 2000 اەك). ازىرگە وكىلەتتى ورگانعا سىيلىقاقى الۋ ءۇشىن بارلىعى 224 تاپسىرىس كەلىپ تۇسكەن. سپيكەرلەر الەۋمەتتىك باعىتتار بويىنشا 55 گرانتتىق جوبا ىسكە اسىرىلعانىن مالىمدەدى.

سونىمەن قاتار، مينيسترلىك مەملەكەتتىك الەۋمەتتىك تاپسىرىس نەگىزىندە ۇەۇ-مەن جوبالىق سەرىكتەستىكتى دامىتۋدى قولعا الدى. بيىل 8 ورتالىق مەملەكەتتىك ورگان جانە جەرگىلىكتى اتقارۋشى ورگانداردىڭ 364-كە جۋىق سالالىق قۇرىلىمدارى رەسپۋبليكا بويىنشا ورتالىق دەڭگەيدە جالپى سومماسى 569،2 ملن. تەڭگەنى قۇرايتىن 43 جوبانى، جەرگىلىكتى دەڭگەيدە سومماسى 13،9 ملرد. تەڭگە بولاتىن 2103 جوبانى (جەرگىلىكتى اتقارۋشى ورگانداردىڭ مالىمەتتەرى بويىنشا) ىسكە اسىرىپ جاتىر.