كاريب باسسەينى ارالدارىندا ميلليوننان اسا ادام  «يرما» داۋىلىنان زارداپ شەكتى. ودان بولەك 26 ميلليون تۇرعىنعا ءقاۋىپ ءتونىپ تۇر دەيدى قىزىل كرەست حالىقارالىق كوميتەتى. بۇل تۋرالى Qamshy.kz اقپارات اگەنتتىگى BBC-گە سىلتەمە بەرىپ حابارلايدى.

كوميتەتتىڭ مالىمەتىنشە، داۋىل سالدارىنان باربادوستاعى بارلىق عاماراتتار قيراپ، پۋەرتو-ريكو تۇرعىندارى ەلەكتر ەنەرگياسىز قالدى. سوڭعى مالىمەتتەرگە سايكەس، داۋىل 10 ادامنىڭ ءومىرىن جالماعان. اتالعان كوميتەت داۋىلدان زارداپ شەككەن تۇرعىندارعا جاردەم رەتىندە 600 مىڭ فرانك قاراجات ءبولىپ وتىر.

داۋىل ءوزىنىڭ ەڭ ماكسيمالدى دەڭگەيىنە جەتىپ،  جىلدامدىعى 300 كم/ساعاتتى قۇراعان. ول اتلانتيكاداعى سوڭعى ون جىلدا ورىن العان ەڭ كۇشتى داۋىل دەپ باعالاپ وتىر. ءتىپتى، ماماندار «يرما» داۋىلىن   تامىز ايىنىڭ سوڭىندا تەحاستا ورىن العان  «حارۆي» داۋىلىنان دا كۇشتى بولعانىن ايتادى.

قازىرگى ۋاقاتتا داۋىل گايتيگە قاراي بەت العان. سودان سوڭ كۋباعا، ال جەكسەنبى كۇنى فلوريدا شتاتىنا دەيىن جەتەدى دەپ بولجالۋدا.

«يرما» داۋىلىنان زارداپ شەككەن باربۋدا ارالى مۇلدەم تىرشىلىككە قولايسىز بولىپ قالعان.