«نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەد پاۆلودار وبلىسىنا باردى دەپ حابارلايدى Qamshy.kz اقپارات اگەنتتىگى. ساپار بارىسىندا ول يندۋستريالدى-يننوۆاسيالىق دامۋ مەملەكەتتىك باعدارلاماسى اياسىندا سالىنعان كاسىپورىنداردا بولدى. سونداي-اق، پاۆلودار ءتۇستى مەتاللۋرگيا كوللەدجىنىڭ جاڭادان سالىنعان ستۋدەنتتەر ۇيىنە جانە پاۆلودار مەملەكەتتىك پەداگوگيكالىق ينستيتۋتى جانىنداعى «Margulan center» عىلىمي ورتالىعىنا ات باسىن بۇردى.
مۇحتار قۇل-مۇحاممەد وبلىس اكىمى بولات باقاۋوۆپەن بىرگە «پاۆلودار» ارنايى ەكونوميكالىق ايماعىنا باردى. مۇندا ءقازىردىڭ وزىندە 6 يننوۆاسيالىق كاسىپورىن جۇمىس ىستەپ تۇر. الداعى ۋاقىتتا تاعى 6 ءوندىرىس ورنى ىسكە قوسىلماق.
ارنايى ەكونوميكالىق ايماقتاعى زاماناۋي ءوندىرىس وشاقتارىنىڭ ءبىرى «گيسسەنحاۋز» زاۋىتى قوسپالى اليۋمينيي ونىمدەرىن دايىندايدى. تولىعىمەن گەرمانيالىق تەحنولوگيامەن جابدىقتالعان مۇنداي ءوندىرىس ورنى اۆستريا، گەرمانيا سياقتى ەۋروپانىڭ دامىعان ەلدەرىندەگى كاسىپورىنداردان ەش كەم ەمەس. ارنايى ەكونوميكالىق ايماعىندا ورنالاسقان «اگروحيمپروگرەسس» زاۋىتى دا تولىعىمەن قازىرگى زامانعى قوندىرعىلارمەن جابدىقتالعان. يندۋستريالدى-يننوۆاسيالىق دامۋ مەملەكەتتىك باعدارلاماسى ارقىلى سالىنعان بۇل كاسىپورىندا مينەرالدى تىڭايتقىشتار، وسىمدىكتەردى قورعاۋعا ارنالعان حيميالىق قوسپالار، شەگىرتكەگە قارسى بيولوگيالىق دارى-دارمەك جانە ارامشوپتەرگە قارسى قولدانىلاتىن گليفوسات-گەربيسيد وندىرىلەدى.
اتالعان كاسىپورىنداردىڭ جۇمىسىمەن تانىسقان «نۇر وتان» پارتياسى ءتوراعاسىنىڭ ءبىرىنشى ورىنباسارى پاۆلودار ءوڭىرىنىڭ وسىنشالىقتى قارقىندى دامۋى ەلباسىمىزدىڭ ەرەن ەڭبەگىنىڭ جەمىسى ەكەنىن ايتتى. بۇل جونىندە مۇحتار قۇل-مۇحاممەد: «ەلباسىمىزدىڭ ايرىقشا قامقورلىعىنىڭ ارقاسىندا پاۆلودار وبلىسىنىڭ ەكونوميكالىق، الەۋمەتتىك جانە رۋحاني دامۋىندا وراسان زور ورلەۋ ورىن الۋدا. تەك يندۋستريالدى-يننوۆاسيالىق دامۋ باعدارلاماسى بويىنشا وڭىردە 35 ءىرى ونەركاسىپ ورنى اشىلىپ، وعان 1 تريلليون تەڭگەدەن استام قاراجات ءبولىندى. «نۇرلى جول» باعدارلاماسى بويىنشا كەيىنگى ەكى جىلدا عانا وبلىسقا 125 ملرد. تەڭگە قارجى جۇمسالعان. مۇنداي قارقىندى دامۋ ءوڭىر تاريحىندا بۇرىن-سوڭدى بولعان ەمەس. وبلىستا بالاباقشا، مەكتەپ ماسەلەسى دە ءبىرجولاتا شەشىلگەن. حالقىمىزعا قازاق عىلىمى مەن ادەبيەتىنىڭ ايتۋلى قايراتكەرلەرىن بەرگەن وڭىردە «رۋحاني جاڭعىرۋ» بويىنشا دا كوپتەگەن جوبالار جۇزەگە اسۋدا. پاۆلودارلىقتار ەلباسىنىڭ وسى قامقورلىعىن باعالاي ءبىلۋى كەرەك»، – دەدى.
سونىمەن قاتار، مۇحتار قۇل-مۇحاممەد پاۆلودار ءتۇستى مەتاللۋرگيا كوللەدجىندە بولىپ، ستۋدەنتتەرمەن كەزدەستى. ودان بولەك، پاۆلودار مەملەكەتتىك پەداگوگيكالىق ينستيتۋتى جانىنداعى «Margulan center» عىلىمي ورتالىعىندا بولدى. وندا ول «رۋحاني جاڭعىرۋ» باعدارلاماسى بويىنشا اتقارىلىپ جاتقان جۇمىستارمەن تانىستى.
