بۇگىن ۇكىمەت وتىرىسىندا ق ر اۋىل شارۋاشىلىعى ءبىرىنشى ۆيسە-مينيسترى ق.ايتۋعانوۆ وسى جىلعى ەگىن جيناۋ جۇمىستارىنىڭ بارىسى تۋرالى باياندادى، دەپ حابارلايدى Qamshy.kz اقپارات اگەنتتىگى ق ر اشم باسپا ءسوز قىزمەتىنە سىلتەمە جاساپ.

«بۇگىنگى تاڭدا رەسپۋبليكا بويىنشا 11،6 ملن. گا استىق جينالىپ، 14،7 ملن. توننا باستىرىلدى. ەگىن جيناۋ قارقىنى بىلتىرعى جىلدىڭ وسى ۋاقىتىمەن سالىستىرعاندا 2،4 ملن. گا نەمەسە 16% ارتىق، رەسپۋبليكا بويىنشا بارلىق ەگىستىك القاپتىڭ 76،7% جينالدى. وڭتۇستىك جانە باتىس قازاقستان، جامبىل وبلىستارىندا ماساقتى ءداندى-داقىلداردى جيناۋ اياقتالدى»، – دەدى ق.ايتۋعانوۆ.

ايتا كەتەيىك، ەلىمىزدىڭ سولتۇستىكتەگى باستى استىقتى وڭىرلەرىنەن 10،6 ملن. توننا استىق جينالدى.

سونىمەن قاتار ۇكىمەت وتىرىسىنىڭ بارىسىندا بيداي، ارپا، باۋ-باقشا جانە مايلى داقىلداردى جيناۋ جۇمىستارىنىڭ بارىسى دا ءسوز بولدى.

«ارپانى جيناۋ جۇمىستارى اياقتالۋدا. قازىرگى ۋاقىتتا 1،8 ملن. گا نەمەسە اۋماقتىڭ 86% جينالىپ، 2،7 ملن. توننا ءونىم الىندى. مايلى داقىلدار بويىنشا جالپى اۋماقتىڭ 24% جينالىپ، 1،2 ملن. توننا ءونىم الىندى. بۇل كورسەتكىش بىلتىرعى جىلدىڭ كولەمىنەن 10% ارتىق. باقشا داقىلدارىن جيناۋ جۇمىستارى دا جالعاسۋدا. الماتى، جامبىل، وڭتۇستىك قازاقستان وبلىستارى بويىنشا اۋماقتىڭ 76% جينالىپ، 3،1 ملن. توننا ءونىم الىندى (بىلتىرعى جىلدان 13% ارتىق). قانت قىزىلشاسى بىلتىرعى جىلعا قاراعاندا 1،5 ەسەگە ارتىق جينالادى دەپ كۇتىلۋدە.»، – دەدى ءبىرىنشى ۆيسە-مينيستر.

كوكتەمگى ەگىن جيناۋ جۇمىستارى ءۇشىن ايماقتار ارزانداتىلعان جانار-جاعار مايمەن قامتاماسىز ەتىلدى. استىق قابىلداۋ كاسىپورىندارىنىڭ ماتەريالدىق-تەحنيكالىق بازاسى جاڭا ەگىن استىعىن قابىلداۋعا دايىن.

استىق ساقتاۋ قويمالارىنىڭ رەيتينگىسىن انىقتاۋ (سەنىمدى، جارامدى، سەنىمسىز) ادىستەمەسى ازىرلەندى. وسى جىلدان باستاپ «ازىق-تۇلىك كەلىسىم شارت كورپوراسياسى» رەيتينگى تومەن استىق قابىلداۋ كاسىپورىندارىمەن جۇمىس ىستەمەيتىن بولادى.

استىقتىڭ ساپاسىن ارتتىرۋ ماقساتىندا اعىمداعى جىلى تۇقىم شارۋاشىلىعى مەن مينەرالدى تىڭايتقىشتارعا كورسەتىلەتىن قولداۋ تۇرلەرى ارتتى. سونىڭ نەگىزىندە، 3 سۇرىپتى بيدايدىڭ ۇلەسى 76% قۇرادى، بىلتىر بۇل كورسەتكىش 44% بولعان، ال كلەيكوۆيناسى 25 پايىزدان جوعارى بيدايدىڭ ۇلەسى – 47%، 2016 جىلى بۇل كورسەتكىش نەبارى 9% قۇرادى.

بيىلعى جىلى استىقتىڭ جالپى كولەمى 19،5 ملن. توننانى قۇرايدى دەپ كۇتىلۋدە. ەلىمىزدىڭ سولتۇستىك استىقتى وڭىرلەرىنەن 15 ملن. توننا اسىتق جينالادى دەپ جوسپارلانۋدا.

شارۋالار ءۇشىن تاعى ءبىر جاڭالىق – «ازىق-تۇلىك كەلىسىم شارت كورپوراسياسى» اق ارقىلى بيداي باعاسىنىڭ ءدالىزى ونىڭ ساپاسى مەن جەتكىزۋ ورنىنا بايلانىستى كەڭەيتىلۋى. مىسالعا، قۇرامىندا 32% كلەيكوۆينا جانە 15% پروتەينى بار 5 سۇرىپتاعى بيدايدىڭ تونناسى – 60000 تەڭگە. 2 سۇرىپتاعى ارپا باعاسى جەتكىزۋ كولەمى 1000 تونناعا دەيىن بولسا، 40000 تەڭگەگە، ال جەتكىزۋ كولەمى 1000 توننادان ارتىق بولسا، تونناسى 41000 تەڭگەگە دەيىن ارتتى.

وسى جىلى ەگىن جيناۋ ناۋقانى ۋاقىتىلى اياقتالادى دەپ كۇتىلۋدە.