ب.تولەگەنوۆانىڭ IX حالىقارالىق ۆوكاليستەر كونكۋرسىنىڭ جەڭىمپازى انىقتالدى دەپ حابارلايدى Qamshy.kz اقپارات اگەنتتىگى.
استانا قالاسىندا ەكسپو-2017 كورمەسىنىڭ مادەني باعدارلاما اياسىندا وتكەن بيبىگۇل تولەگەنوۆانىڭ IX حالىقارالىق ۆوكاليستەر كونكۋرسى اياقتالدى. بيىل كلاسسيكالىق ءان سايىسىنا 36 ونەرپاز قاتىسىپ، باقتارىن سىنادى. ال ولاردىڭ اراسىنان موڭعوليادان كەلگەن باتجارگال بايارسايحان ۇزدىك شىعىپ، گران-پريدى يەلەندى.
ىرىكتەۋ جانە اقتىق كەزەڭ 2017 جىلدىڭ قىركۇيەكتىڭ 5ء-ى مەن 10-ى ارالىعىندا قازاقستان رەسپۋبليكاسى قارۋلى كۇشتەرىنىڭ ۇلتتىق اسكەري-پاتريوتتىق ورتالىعىندا وتكەن بولاتىن. ال 10 قىركۇيەك كۇنى «قازاقستان» ورتالىق كونسەرت زالىندا جەڭىمپازداردى ماراپاتتاۋ سالتاناتى مەن گالا-كونسەرت بولدى.
كونكۋرس جەڭىمپازى باتجارگال بايارسايحان: «بۇعان دەيىن باسقا ءان دودالارىنا قاتىسقانمىن. ال، بيبىگۇل تولەگەنوۆا ۆوكاليستەرىنىڭ كونكۋرسى ەرەكشە ءوتتى. قازىلار القاسى تالاپشىل، ءادىل ءارى جاناشىر. موڭعوليادا بيبىگۇل تولەگەنوۆانى حالىق جاقسى بىلەدى. كونكۋرس ۇيىمداستىرۋشىلارىنا العىسىمدى ايتامىن. ەلىمە بارعان سوڭ جاستارعا وسى بايقاۋعا قاتىسۋعا كەڭەس بەرەتىن بولامىن»، - دەيدى.
كونكۋرستىڭ جابىلۋ شاراسىندا بيبىگۇل تولەگەنوۆا جەڭىمپازداردى قۇتتىقتاپ، ولاردىڭ ونەرى مەن ومىرىنە اق جول تىلەدى. تالانتتى ەڭبەكپەن، ىزدەنىسپەن ۇشتاستىرۋعا شاقىردى. بيىل كونكۋرستىڭ قازىلار القاسىنىڭ مۇشەلىگىندە وسى كونكۋرستىڭ ءار جىلدارداعى جەڭىمپازدارى اتانعان وپەرا انشىلەرى وتىردى.
«جاستارمەن جۇمىس ىستەگەن وتە قىزىق. بيىل ارمەنيا، بولگاريا، رەسەي، وزبەكستان، موڭعوليا، قازاقستان قالالارىنان ونەرپازدار قاتىستى. 42 قاتىسۋشى ءوتىنىش جىبەرىپ، سونىڭ 36-سى كەلدى. 14 ادام اقتىق سىنعا شىعىپ، وركەستردىڭ سۇيەمەلدەۋىمەن ونەر كورسەتتى. جاستاردىڭ ونەرگە دەگەن قىزىعۋشىلىعى، ۇمتىلىسى ەرەكشە»، - دەيدى كونكۋرس ۇيلەستىرۋشىسى قارلىعاش ابدىكاريموۆا.
سونىمەن قاتار III ورىندى ابدۋلمانوۆا الفيا،ءابىلدين قۇدايبەرگەن، قازاقستان، باقىتجان سۇلتان، قازاقستان، ال II ورىندى ايسينا ديانا، رەسەي ەلىنەن، شپەكپايەۆا ەلميرا مەن قاناتبەك ايبەك ەلىمىزدىڭ اتىنان قاتىستى. باجبەۋك - مەليكيان سارگيس، ارمەنيادان، راسىلحان شىڭعىس قازاقستاننان، پيازوۆ اقىلبەك وزبەكستاننان كەلىپ I ورىندى يەلەندى
ەسكە سالا كەتەيىك، كونكۋرسقا 1985 جىلى 1 قازاننان ەرتە ەمەس جانە 1998 جىلى 1 قازاننان كەش ەمەس تۋىلعان ءانشى قىز-جىگىتتەر قاتىستى. كونكۋرستىق سىناق ىرىكتەۋ جانە اقتىق كەزەڭدەرىنەن تۇردى. بارلىق تىڭداۋلار كوپشىلىك الدىندا وتكىزىلەدى. حالىقارالىق ۆوكاليستەر كونكۋرسى جاستارىمىزدىڭ نازارىن كلاسسيكالىق جانە حالىق مۋزىكاسىنا تارتۋدى ماقسات ەتتى. ونەر كورسەتۋ ءتارتىبى جەرەبە تاستاۋ ارقىلى انىقتالىپ، كونكۋرس سوڭىنا دەيىن ساقتالدى. كونكۋرسقا قاتىسۋشىلاردىڭ ونەرىن بەدەلدى ءارى كاسىبي قازىلار القاسى باعالادى. قازىلار ءتوراعاسى – كسرو حالىق ءارتيسى، سوسياليستىك ەڭبەك ەرى، كسرو جانە قازاقستاننىڭ مەملەكەتتىك سىيلىق لاۋرەاتى، اكادەميك بيبىگۇل تولەگەنوۆا. كونكۋرستىڭ نەگىزگى ۇيىمداستىرۋشىسى – قازاقستان رەسپۋبليكاسىنىڭ مادەنيەت جانە سپورت مينيسترلىگى، سونداي-اق، «ميراس» مادەنيەتتىڭ قوعامدىق ۇلتتىق قورى» قوعامدىق قورى.
