اكىمدەرگە جەكە تۇرعىن ءۇي قۇرىلىسى قاجەتتىگى ءۇشىن مەملەكەت مۇقتاجدىعىنا جاتقىزۋ ارقىلى جەكەمەنشىكتەگى جەرلەردى  الۋ قۇقىعى بەرىلەدى. بۇل تۋرالى بۇگىن ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا ق ر اۋىل شارۋاشىلىعى مينيسترلىگى جەر رەسۋرستارىن باسقارۋ كوميتەتى ءتوراعاسىنىڭ ورىنباسارى ەركەبۇلان داۋىلبايەۆ ءمالىم ەتتى، - دەپ حابارلايدى Qamshy.kz اقپارات اگەنتتىگى  قازاقپاراتقا سىلتەمە جاساي وتىرىپ.

«قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسىن تانىستىرعان ول: «اۋىل شارۋاشىلىعى جەرلەرىنىڭ كوپ بولىگىنىڭ «ءبىر قولعا» بەرىلۋىن بولدىرماۋ ماقساتىندا زاڭ جوباسىندا ءار وبلىستىڭ اكىمشىلىك اۋداندارى (قالالارى) شەگىندە قازاقستاندىقتارعا جالعا بەرىلۋى مۇمكىن اۋىل شارۋاشىلىعى جەرلەرىنىڭ ەڭ جوعارعى مولشەرىن بەلگىلەۋ كوزدەلگەن.

بۇل رەتتە، وبلىستىڭ بىرنەشە اۋداندارىنداعى نە بىرنەشە وبلىستارداعى اۋىل شارۋاشىلىعى جەرلەرىن «ءبىر قولعا» بەرۋ بەرىلەتىن جەرلەردىڭ جيىنتىق الاڭى رەسپۋبليكا ءۇشىن بەلگىلەنگەن شەكتى (ەڭ جوعارعى) مولشەردەن اسپايتىن جاعدايدا عانا مۇمكىن بولادى. بۇل رەتتە، اۋىل شارۋاشىلىعى جەرلەرىن رەسپۋبليكا بويىنشا شەكتى (ەڭ كوپ) مولشەردەن اساتىن كولەمدە «ءبىر قولعا» بەرۋگە جول بەرىلمەيدى. ولاردىڭ مولشەرى وكىلدى جانە اتقارۋشى ورگانداردىڭ بىرلەسكەن ۇسىنىسىنىڭ نەگىزىندە ۇكىمەتپەن بەكىتىلەدى»، - دەدى ول.

ونىڭ ايتۋىنشا، اۋىل شارۋاشىلىعى مينيسترلىگى اۋىل شارۋاشىلىعى جەرلەرىنىڭ ەڭ كوپ مولشەرىن ايقىنداۋ ءۇشىن ءتيىستى ەسەپتەۋ ادىستەمەسىن ازىرلەۋدە، وندا رەسپۋبليكانىڭ ءاربىر ءوڭىرىنىڭ جاعدايى مەن ەرەكشەلىگى ەسكەرىلەتىپ بولادى.

«مۇنان باسقا، زاڭ جوباسىندا شەكارالىق بەلدەۋ مەن شەكارا اۋماعىندا ورنالاسقان جەر ۋچاسكەلەرىن شەتەلدىكتەرگە، ازاماتتىعى جوق ادامدارعا، قازاقستان رەسپۋبليكاسىنىڭ شەتەلدىكتەرمەن نەكەدە تۇرعان ازاماتتارىنا نەمەسە شەتەلدىك زاڭدى تۇلعالارعا جانە قازاقستان رەسپۋبليكاسىنىڭ شەتەلدىكتەر قاتىساتىن زاڭدى تۇلعالارىنا بەرۋگە تىيىم سالىنادى. مەملەكەتتىك شەكارانىڭ شەكارالىق بەلدەۋىندە ورنالاسقان اۋىل شارۋاشىلىعى جەرلەرى جەكە مەنشىككە دە، جەر پايدالانۋعا دا بەرىلمەيدى. اتالعان بەلدەۋدە اۋىل شارۋاشىلىعى جەرلەرىن جەرگىلىكتى حالىقتىڭ مۇقتاجدىقتارى (جايىلىم، شابىندىق رەتىندە جانە ت.ب.) ءۇشىن عانا پايدالانۋعا رۇقسات ەتىلەدى. مەملەكەتتىك شەكارانىڭ شەكارا اۋماعىندا ورنالاسقان اۋىل شارۋاشىلىعى جەرلەرى تەك قازاقستان رەسپۋبليكاسىنىڭ ازاماتتارى مەن زاڭدى تۇلعالارىنا (شەتەلدىكتەر قاتىسپايتىن) عانا ۋاقىتشا جەر پايدالانۋ قۇقىعىندا بەرىلەتىن بولادى. زاڭ جوباسىمەن جەكە اۋلا مالىن جايۋعا جايىلىم القاپتارىنىڭ جەتىسپەۋشىلىگى پروبلەماسىن شەشۋ ماقساتىندا ەلدى مەكەندەر اينالاسىندا حالىقتىڭ مۇقتاجدىعىن قاناعاتتاندىرۋ ءۇشىن ونداعى جەكە اۋلا مالىنىڭ كولەمى بويىنشا جايىلىم الاڭدارىن ايقىندايتىن نورما كوزدەلەدى. اتالعان اۋماقتاردا قازاقستان رەسپۋبليكاسىنىڭ جەكە جانە زاڭدى تۇلعالارىنا ولاردى جەر پايدالانۋ قۇقىعىندا بەرۋگە تىيىم سالىناتىن بولادى. قازىرگى ۋاقىتتا ەلدى مەكەندەردىڭ اينالاسىنداعى جايىلىمداردىڭ كوپ بولىگى جەكەلەگەن تۇلعالاردىڭ جەكە مەنشىگى مەن جەر پايدالانۋىندا ەكەنىن ەسكەرە وتىرىپ، اكىمدەرگە قاجەتتىلىكتى نەگىزدەۋ ارقىلى حالىققا كەرەك جايىلىمدار مەن جەكە تۇرعىن ءۇي قۇرىلىسى ءۇشىن قاجەتتى جەر ۋچاسكەلەرىمەن قامتاماسىز ەتۋ دەگەن قاجەتتىلىگىن مەملەكەت مۇقتاجدىعىنا جاتقىزۋ ارقىلى ولاردى الىپ قويۋ مۇمكىندىگى بەرىلەتىن بولادى»، - دەدى ە.داۋىلبايەۆ.

بۇل رەتتە، ونىڭ سوزىنە قاراعاندا، جەر رەفورماسى شەڭبەرىندە جەكە تۇرعىن ءۇي قۇرىلىسى ءۇشىن قاجەتتى جەر ۋچاسكەلەرىمەن قامتاماسىز ەتۋ ماسەلەسى كەڭىنەن تالقىلانعانى ەسكەرىلىپ، وعان قاجەتتىلىكتى ەلدى مەكەننىڭ باس جوسپارىنا سايكەس، قاناعاتتاندىرۋ ماسەلەسىن شەشۋ قاراستىرىلادى.