لاتىن الىپبيىنە كوشۋ ءۇشىن 600 ميلليون تەڭگە بولىنەدى، دەپ حابارلايدى Qamshy.kz اقپارات اگەنتتىگى 24.kz سايتىنا سىلتەمە جاساپ. بۇل تۋرالى ق ر ۇلتتىق ەكونوميكا ءمينيسترى تيمۋر سۇلەيمەنوۆ ماجىلىستەگى ءۇش جىلدىق بيۋدجەتتىڭ جوباسىن تانىستىرۋ بارىسىندا ايتتى.

تەلەارنانىڭ مالىمەتىنشە، 2018 جىلى بيۋدجەتتىڭ تابىسى شامامەن 5 تريلليون تەڭگە بولادى. ال شىعىنى 9 تريلليوننان اسادى. ايتۋلارىنشا، قاراجاتتىڭ باسىم بولىگى الەۋمەتتىك باعدارلامالاردى جۇزەگە اسىرۋعا جۇمسالادى.

تيمۋر سۇلەيمەنوۆتىڭ ايتۋىنشا، 2018 جىلى ەلىمىزدەگى جالپى ىشكى ءونىمنىڭ ءوسىمى 3،1 پايىز دەڭگەيىندە بولادى دەپ بولجانىپ وتىر. سونداي-اق، مينيستر بيۋدجەت قاراجاتىن يگەرۋ ماسەلەسىنىڭ شەشىلۋى مۇمكىن ەكەنىن ايتتى.

"قوسىمشا فۋنكسيالار قاراستىرىلىپ جاتىر، مىسالى، قازىناشىلىق سۇيەمەلدەۋ. باعدارلامالاردى جۇزەگە اسىرۋ ماقساتىندا مەردىگەرلەرگە بولىنەتىن بيۋدجەت قاراجاتىنىڭ يگەرىلۋىن باقىلايتىن قازىناشىلىق ورگاندار. ەندى وسى ورگاندار قاراجاتتىڭ تولىقتاي يگەرىلۋىن قاداعالاپ، سايكەسىنشە، ولاردا سول جۇمىستاردىڭ ورىندالعانىن راستايتىن قۇجاتتار بولادى"، - دەدى ق ر پارلامەنت ءماجىلىسىنىڭ دەپۋتاتى ومارحان وكسىكبايەۆ.

ەسكە سالا كەتسەك، 11 قىركۇيەكتە ق ر پارلامەنت ماجىلىسىندە "مەملەكەتتىك ءتىلدىڭ لاتىن گرافيكاسىنداعى ءالىپبيىنىڭ ءبىرىڭعاي ستاندارتىن ەنگىزۋ ماسەلەلەرى تۋرالى" تىڭداۋ وتكەن ەدى. سول تىڭداۋدا ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق كوورديناسيالىق-ادىستەمەلىك ورتالىعىنىڭ ديرەكتورى، فيلولوگيا عىلىمدارىنىڭ دوكتورى ەربول تىلەشوۆ قازاق ءالىپبيىنىڭ جاڭا نۇسقاسىن ۇسىنعان بولاتىن. ونىڭ ايتۋىنشا، جاڭا نۇسقادا 25 ءارىپ بولادى.