دەموكراتيالىق كۇشتەردىڭ "قازاقستان-2050" جالپىۇلتتىق كواليسياسىنىڭ وتىرىسىندا «جاس وتان» جاستار قاناتىنىڭ ءتوراعاسى دانيار سۇندەتبايەۆ لاتىن ءقارپىن قولدانۋ قازاق ءتىلىنىڭ مارتەبەسىن كوتەرىپ، تابيعي تازا قالپىنىڭ ساقتالۋىنا مۇمكىندىك بەرەتىنىن ايتتى دەپ حابارلايدى Qamshy.kz اقپارات اگەنتتىگى.

"بارشامىزعا بەلگىلى، ەلباسى  «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا لاتىن قارپىنە اۋىسۋدى ماقسات ەتىپ ايقىنداپ بەرگەن بولاتىن. لاتىن الىپبيىنە اۋىسۋ ەلىمىزدىڭ الەمدىك ارەناداعى باسەكەگە قابىلەتتىگىن ارتتىرا وتىرىپ، ءۇش تىلدىلىككە كوشۋ ءۇردىسىن جىلدامداتادى. سونىمەن قاتار، لاتىن ءقارپىن قولدانۋ قازاق ءتىلىنىڭ مارتەبەسىن كوتەرىپ، تابيعي تازا قالپىنىڭ ساقتالۋىنا مۇمكىندىك بەرەدى.  

لاتىن – بۇل عىلىم مەن تەحنيكانىڭ ءتىلى. لاتىن ءبىلىم، عىلىم جانە ءوندىرىستى ۇشتاستىرعان ءتىل. لاتىن قارپىنە كوشۋ - زامان تالابى. كەز-كەلگەن يننوۆاسيالىق تەحنولوگيا، كومپيۋتەر، سمارتفون مەن گادجەتتەردىڭ باستاپقى پروگراممالارى لاتىن قارپىمەن جازىلادى. فيزيكا، حيميا، ماتەماتيكا، بيولوگيا، ەكونوميكا سالالارىندا قولدانىلاتىن فورمۋلالار لاتىن قارپىندە. الەم بويىنشا كوپ تارالعان جازبا – لاتىن جازباسى، ونى  جەر شارى تۇرعىندارىنىڭ 40%-ى قولدانادى. 

اعىلشىن  ءتىلىن مەڭگەرۋدىڭ ارقاسىندا تۇگەل جاستار قازىرگى تاڭدا  لاتىن ءقارپىن تولىق بىلەدى، جانە بۇل جاڭالىقتى قۋانىشپەن قابىلدايدى. وسىعان بايلانىستى 164 مىڭ جاسوتاندىق لاتىن قارپىنە اۋىسۋدى قولداي وتىرىپ، بۇل ءۇردىستىڭ ۇلتتىق بىرەگەيلىگىمىز بەن  بولمىسىمىزدى ساقتاپ قالۋدىڭ بىردەن ءبىر نەگىزى ەكەنىن ايتامىز. كۇنى كەشە ەلىمىزدىڭ بارلىق وڭىرىنە لاتىن قارپىنە كوشۋدى قولدايتىندىعىمىز تۋرالى  الەۋمەتتىك جەلىلەر مەن اقپاراتتىق پورتالداردا ۇندەۋ جاريالاعان بولاتىنبىز. ول  ەلىمىزدىڭ بارلىق جاستار تاراپىنان قولداۋ تاۋىپ، ءالى دە تارالىپ جاتىر.

لاتىن قارپىنە كوشۋ جايلى ەلباسىمىز تاۋەلسىزدىك العان جىلداردان بەرى ايتىپ كەلەدى. بۇگىن قۋانىشقا وراي ءىس جۇزىندە ناقتى قادامدار جاسالىپ جاتىر. ءبىز، جاستار لاتىن قارپىنە كوشۋگە بايلانىستى ورىن الاتىن ءبىلىم مەن عىلىمداعى ايتارلىقتاي بەتبۇرىسقا دايىنبىز!" دەدى دانيا سۇندەتبايەۆ.