تۇركىستان مەشىتىن توناماق بولعان ادام قىلمىس جاساۋ كەزىندە ۇستالدى. ول وسى قۇلشىلىق ورنىنان بۇعان دەيىن 10 مىڭ تەڭگە مەن تۇرمىستىق زاتتى ۇرلاپ كەتكەنى بەلگىلى بولدى. بۇل تۋرالى قالانىڭ پروكۋرورى رۋسلان ءابدىرايىموۆ مالىمدەدى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.

قالا پروكۋرورىنىڭ سوزىنشە، مەشىتتەن ۇستالعان ۇرى تەك قۇلشىلىق ورىندارىن توناۋدى كاسىپ ەتىپ جۇرگەن. ءارى بۇعان دەيىن دە تۇلكىباس اۋدانىنىڭ مەشىتىن توناپ، سوتتى بولىپتى. ال تۇركىستانداعى مەشىتتى توناعانى تۋرالى ءوز جاۋابىندا مويىنداعان.

«تەك مەشىتتەرگە ۇرلىققا ءتۇسۋدى كاسىپ ەتكەن 30 جاس شاماسىنداعى بۇل ازامات كەشە كەشكىسىن كەلەسى ءبىر مەشىتكە ۇرلىققا ءتۇسۋ كەزىندە قۇرىقتالدى. بۇل ادامعا قاتىستى ءقازىر سوتقا دەيىنگى تەرگەپ-تەكسەرۋ باستالدى»، - دەيدى رۋسلان ءابدىرايىموۆ.

پروكۋروردىڭ ايتۋىنشا وسى كۇنى پوليسەيلەر قالا كوشەلەرىندە تۇرعىنداردى اشىق توناپ جۇرگەن تاعى ءبىر كۇدىكتىنى قولعا تۇسىرگەن.

«ەكىنشى وقيعا بويىنشا 2 ازامات كۇش قولدانۋ ارقىلى 25 جاس شاماسىنداعى كەلىنشەكتى شالىپ قۇلاتىپ، ۇيالى تەلەفونىن تارتىپ الىپ قاشقان. دەر كەزىندە پوليسياعا xابارلاۋدىڭ ناتيجەسىندە، توناۋشىلاردىڭ ءبىرى ۇستالدى. كۇدىكتى قاماۋعا الىندى، ەكىنشىسى ىزدەستىرىلۋدە»، - دەيدى رۋسلان ءابدىرايىموۆ.