اقتوبە وبلىسى حرومتاۋ تاۋ-كەن تەحنيكالىق كوللەدجىنىڭ 1-كۋرس ستۋدەنتى وقۋ ورنىنىڭ ديرەكتورىن سۋىق قارۋمەن قورقىتتى. ءقازىر ول ۋاقىتشا تەرگەۋ يزولياتورىنا قامالدى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ.

اقتوبە وبلىسى حرومتاۋ اۋدانىنداعى كوللەدجدە ءبىلىم الىپ جۇرگەن ستۋدەنت وقۋ جىلى باستالعان كەزدە وقىتۋشىلارمەن ارازداسىپ، ىشكى تارتىپكە باعىنباي، ديرەكتوردىڭ الدىنا بارعان. كەيىن قۇجاتتارىن سۇراپ، وقۋدان ءبىرجولا كەتەتىنىن مالىمدەگەن وقۋشىنىڭ اتا-اناسى ورتا ارناۋلى وقۋ ورنىنا شاقىرىلدى. وسى ارالىقتا وقۋشى پىشاق الىپ كەلىپ، كوللەدج ديرەكتورى باعداشجان مولداشيەۆانى قورقىتادى. وقيعا ورنىنا پوليسيا قىزمەتكەرلەرى دەرەۋ جەتىپ، ەشكىم زارداپ شەككەن جوق. ءقازىر وسى وقيعاعا بايلانىستى قىلمىستىق ءىس قوزعالدى.

«حرومتاۋ اۋدانىنداعى كوللەدج وقۋشىسى ۋاقىتشا تەرگەۋ يزولياتورىنا قامالدى. ونىڭ ۇستىنەن قىلمىستىق كودەكستىڭ «كورقىتۋ»، «بيلىك وكىلىنە قاتىستى كۇش قولدانۋ» باپتارى بويىنشا تەرگەۋ ءجۇرىپ جاتىر»، - دەدى اقتوبە وبلىستىق ءىىد باسپا ءسوز جەتەكشىسى نۇرگۇل قوناقبايەۆا.

بۇعان دەيىن حابارلاعانىمىزداي، وبلىستىق جەرگىلىكتى پوليسيا قىزمەتىنىڭ باستىعى قانىبەك جاقسىعالييەۆ مەكتەپ، كوللەدج ديرەكتورلارىن جيناپ، ساقتىق شاراسىن كۇشەيتۋدى تاپسىرعان بولاتىن. جيىن كەزىندە ول حرومتاۋ اۋدانىنداعى جاسوسپىرىمدەر قىلمىسى 9 ەسە ارتقانىن جەتكىزدى.