21 قىركۇيەكتە امەريكا قۇراما شتاتتارىنىڭ باستاماسى بويىنشا بۇۇ قاۋىپسىزدىك كەڭەسى جاپپاي قىرىپ-جويۋ قارۋىن تاراتپاۋ جانە ولاردى جەتكىزۋ جۇيەلەرىن تاراتۋ ءقاۋپى تاقىرىبى بويىنشا مينيسترلەر دەڭگەيىندە كەزدەسۋ ءوتتى.

باسقوسۋدا بۇۇ قاۋىپسىزدىك كەڭەسىنىڭ قارۋ-جاراقتىڭ تاراتىلۋىن بولدىرماۋ تۋرالى شەشىمدەرىن قولدانۋ جولدارىن تالقىلاندى، دەپ حابارلايدى Qamshy.kz اقپارات اگەنتتىگى ق ر ءسىم باسپا ءسوز قىزمەتىنە سىلتەمە جاساي وتىرىپ. اقش مەملەكەتتىك حاتشىسى رەكس تيللەرسون ءوزىنىڭ اۋقىمدى بايانداماسىندا جاھاندىق قارۋسىزدانۋ مەن تاراتپاۋ ۇدەرىسىندەگى قازاقستاننىڭ رولىنە بولەك نازار اۋداردى.

اتاپ ايتقاندا، ول يادرولىق قارۋدان باس تارتقان ەلىمىز دانالىقتىڭ ايرىقشا ۇلگىسى بولىپ تابىلاتىنىن اتاپ ءوتتى. قازاقستان بۇرىنعى كەڭەستىك قارۋلاردى جانە يادرولىق تەحنولوگيالاردى ءوز اۋماعىنان الىپ تاستادى جانە يادرولىق ەمەس مەملەكەت رەتىندە يادرولىق قارۋدى تاراتپاۋ تۋرالى شارتقا قوسىلدى.

«قازاقستان باسشىلىعىنىڭ باتىل شەشىمى يادرولىق قارۋدىڭ، ونىڭ قۇرامداس بولىكتەرىنىڭ، يادرولىق ماتەريالداردىڭ جانە قوس ماقساتتى تەحنولوگيالاردىڭ زيانكەستەردىڭ قولىنا ءتۇسۋ ءقاۋپىن ەداۋىر قىسقارتتى»، - دەپ اتاپ ءوتتى ر. تيللەرسون.

ونىڭ پىكىرىنشە، يادرولىق قارۋ باسقا ەلدەرمەن قارىم-قاتىناستاردى قيىنداتىپ، ەسەپتەن جاڭىلىسۋ، اپاتتار نەمەسە تاراتۋ ءقاۋپىن تۋدىرادى. مەملەكەتتىك حاتشى قازاقستاننىڭ ارەكەتى ەلدى حالىقتار قاۋىمداستىعىنا تارتۋ ۇدەرىسىندە ماڭىزدى قادام بولعاندىعىنا ەرەكشە توقتالدى.

«يادرولىق قارۋدان قۇتىلۋدىڭ ناتيجەسىندە الەم قازاقستاندى يادرولىق اگرەسسورعا اينالۋى مۇمكىن «الاستاتىلعان» مەملەكەت رەتىندە قاراستىرمايدى. ول ءوزىنىڭ يادرولىق كورشىلەرى - رەسەي مەن قىتايدىڭ دۇشپانىنا دا اينالعان جوق. سونداي-اق بۇگىندە قازاقستان كورشىلەرىمەن تاتۋ-بەيبىت ءومىر سۇرۋدە. ول بەرىك ساۋدا قاتىناستارىن دامىتۋدا. بيىل  ەكسپو-2017 حالىقارالىق مامانداندىرىلعان كورمەسى ءوتىپ، ول بولاشاقتىڭ ەنەرگيا كوزدەرىن جانە بۇكىل الەمنىڭ قاتىسۋشىلارىنا قازاقستاننىڭ ينۆەستيسيالىق مۇمكىندىكتەرىن كورسەتتى. بۇل وڭىرلىك جانە حالىقارالىق بەيبىتشىلىك پەن وركەندەۋگە ەلەۋلى ۇلەس قوسىپ وتىرعان زاماناۋي مەملەكەت. قازاقستان ءوزىنىڭ شەشىمىنەن تەك پايدا كوردى»،- دەدى ول.

«بۇرىنعى كاسىبي قىزمەتىمدە پرەزيدەنت نۇرسۇلتان نازاربايەۆپەن بىرنەشە رەت كەزدەستىم جانە وعان وسى شەشىم تۋرالى سۇراق قويۋىما مۇمكىندىك بولدى. ول ماعان بۇل شەشىمگە ەشقاشان وكىنبەيتىنىن جانە كۇندەردىڭ بىرىندە بۇل جوبا جاس ەلىمىز ءۇشىن جاساعان ەڭ زور جاقسىلىعى ەكەنىن ايتقان بولاتىن»، - دەپ ەسكە الدى ر. تيللەرسون.

سىرتقى ىستەر ءمينيسترى قايرات ءابدىراحمانوۆ ءوز سوزىندە اقش مەملەكەتتىك حاتشىسىنا ءبىزدىڭ ەلىمىزگە جانە پرەزيدەنت ن. نازاربايەۆقا جولداعان جىلى لەبىزدەرى ءۇشىن العىسىن ءبىلدىردى. مينيستر قاتىسۋشىلاردى اەحا تومەن بايىتىلعان ۋران بانكىنىڭ اشىلۋ كەزىندە جاريالانعان ەلباسىنىڭ باستامالاردان حاباردار ەتتى، سونداي-اق حالىقارالىق قارۋسىزدانۋ جانە تاراتپاۋدىڭ نەگىزگى اسپەكتىلەرى بويىنشا قازاقستاننىڭ ۇستانىمىنا ەگجەي-تەگجەيلى توقتالدى.