1 ماۋسىم - 30 قازان ارالىعىندا رەسپۋبليكا اۋماعىندا جۇرگىزىلىپ جاتقان «كوكنار» جەدەل-پروفيلاكتيكالىق شاراسى اياسىندا قىزىلوردالىق پوليسەيلەر ەسىرتكى القابىن انىقتاپ، كۇدىكتىلەردى قاماۋعا الدى. بۇل تۋرالى Qamshy.kz اقپارات اگەنتتىگى وبلىستىق ءىىد سىلتەمە جاساپ حابارلايدى.

18 قىركۇيەك كۇنى وبلىستىق ءىىد ەسىرتكى بيزنەسىنە قارسى كۇرەس باسقارماسى مەن جالاعاش اۋداندىق ىشكى ىستەر ءبولىمىنىڭ قىزمەتكەرلەرى  بىرلەسكەن شارا بارىسىندا جالاعاش اۋدانى، جاڭاداريا  اۋىلدىق وكرۋگىنەن 80 شاقىرىم قاشىقتىقتا جاسىل ءتۇستى، وزىنە ءتان ءيىسى بار شوپتەكتەس زاتتى تاسىمالداپ كەلە جاتقان 47، 28، 30 جانە 41 جاستاعى ءتورت ازاماتتى ۇستادى. انىقتالعان زاتقا ساراپتاما تاعايىندالىپ، ناتيجەسىندە سالماعى 44 كەلىنى قۇرايتىن «كەپتىرىلگەن ماريحۋانا» ەكەندىگى ناقتىلاندى.

تەرگەۋ بارىسىندا ۇستالعان ازاماتتار ەسىرتكى زاتىن ەگىپ-باپتاۋمەن اينالىساتىندىعى بەلگىلى بولدى. وزدەرى كورسەتكەن القاپتان 1147 ءتۇپ سورا وسىمدىگى انىقتالدى. ساراپتاما قورىتىندىسىمەن ونىڭ ەسىرتكى زاتى ەكەندىگى جانە سالماعى 1 توننا 41 كەلىنى قۇرايتىندىعى  ناقتىلاندى. 

قازىرگى تاڭدا، اتالعان ءتورت ازامات جالاعاش اۋداندىق ءىىب-نىڭ ۋاقىتشا ۇستاۋ اباقتىسىنا قاماققا الىنىپ، ولاردىڭ ۇستىنەن قازاقستان رەسپۋبليكاسى قىلمىستىق كودەكسىنىڭ 300-بابى 2-بولىگى جانە 296-بابى 4-بولىگى بويىنشا قىلمىستىق ىستەر قوزعالدى. سوتقا دەيىنگى تەرگەپ-تەكسەرۋ امالدارى جۇرگىزىلۋدە.