ەلىمىزدە وسىمەن ەكىنشى رەت ۇيىمداستىرىلىپ وتىرعان كينەماتوگرافيا سالاسىنداعى «تۇلپار» ۇلتتىق كينوجۇلدەسىن سالتاناتتى تاپسىرۋ شاراسىندا «وسكار» سىيلىعىنا قازاقستان اتىنان ۇسىنىلاتىن فيلم جاريالاندى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ.   

سونىمەن، 2018 جىلى امەريكانىڭ كينويندۋستريا سالاسىنداعى بەدەلدى سىيلىعىن يەلەنۋ ءۇشىن قازاقستان اتىنان رەجيسسەر اقان ساتايەۆتىڭ «اناعا اپارار جول» تۋىندىسى ۇسىنىلاتىن بولادى.   اقان ساتايەۆتىڭ ءفيلمى قازاقستاندىق - 14 جانە شەتەلدىك 4 ءفيلمنىڭ اراسىنان جەڭىمپاز اتانىپ وتىر. داۋىس بەرۋ جابىق تۇردە ءوتتى.   ەندى بىرنەشە اپتادان كەيىن «اناعا اپارار جول» ءفيلمىن امەريكادا كينوسىنشىلار كورەتىن بولادى.   

باس پروديۋسەر ءاليا نازاربايەۆا مەن رەجيسسەر اقان ساتايەۆتىڭ بىرلەسىپ تۇسىرگەن «اناعا اپارار جول» كارتيناسى ءومىردىڭ اۋىرتپالىعىنا توتەپ بەرگەن، قيىن قىستاۋ كۇندەرى سۇراپىل سوعىستىڭ مەحناتىن كورگەن باستى كەيىپكەردىڭ تاعدىرىن باياندايدى. فيلمدە انانىڭ پەرزەنتىنە دەگەن شەكسىز ماحابباتى، پەرزەنتىنىڭ وتانىنا دەگەن ادالدىعى كورسەتىلگەن.

اتالعان كارتينا 38ء-شى حالىقارالىق ماسكەۋ كينوفەستيۆالىندە جانە «ەۋرازيالىق كوپىر» اتتى فەستيۆالدىڭ، قىرعىزستاننىڭ تانىمال كينەماتوگرافيستەرى ۇيىمداستىراتىن «اق ءىلبىس» ۇلتتىق كينوجۇلدەسىنىڭ باس ماراپاتىن جەڭىپ العان. سونداي-اق نيۋ-يوركتە وتكەن كينوفەستيۆالدا ۇزدىك كوركەم فيلم دەپ تانىلدى. ق ر مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن اتالمىش  تاريحي دراما، سونىمەن قاتار حورۆاتياداعى «ماركو پولو» كينوفەستيۆالىندە باس جۇلدەگە يە بولدى. 

ايتا كەتەيىك، بۇگىن الماتىدا «تۇلپار» ۇلتتىق كينوجۇلدەسىن تاپسىرۋ سالتاناتى ءوتتى. ماراپات ءبىرقاتار نوميناسيا بويىنشا تابىس ەتىلدى. قازاقستاننىڭ «ۇزدىك ءفيلمى» بولىپ اقان ساتايەۆتىڭ «اۋداندار» ءفيلمى تانىلدى.