قازالى اۋدانى، جانقوجا باتىر اۋىلىندا قازاق قوعامىنداعى ءىرى باس كوتەرۋلەردىڭ ءبىرى، ارىقبالىق شايقاسىنىڭ 160 جىلدىعىنا ارنالعان اۋقىمدى شارا ءوتتى، دەپ حابارلادى Qamshy.kz اقپارات اگەنتتىگى اۋداندىق اكىمدىككە سىلتەمە جاساپ.

الدىمەن جينالعان قاۋىم "تاعزىم" الاڭىنا گۇل شوقتارىن قويىپ،   "سارىقۇل قوجا" مەشىتىندە بابالار رۋحىنا ارناپ قۇران باعىشتادى. ودان سوڭ ورتالىق ساياباقتا "ارىقبالىق شايقاسى" تاقىرىبىنداعى تەاترلاندىرىلعان قويىلىمدى تاماشالادى. سالتاناتتى شارادا اۋدان اكىمى ناجمادين شامۇراتوۆ

«وتكەن عاسىرلار قويناۋىندا قازاق جۇرتىنىڭ كورمەگەن ازابى، شەكپەگەن قاسىرەتى جوق. سونىڭ ءبىرى، وسى -  «ارىقبالىق شايقاسى» دەگەن اتپەن قالعان كوتەرىلىسكە بيىل 160 جىل تولدى. بۇگىنگى شارا سانادا اۋىر زاردابى قالعان سول ارىقبالىق شايقاسىنداعى جانقوجا باتىر باستاعان ساربازداردىڭ ەرلىگىن دارىپتەۋ،  وسكەلەڭ ۇرپاقتى وتانسۇيگىشتىككە باۋلۋ، وتكەن تاريحىمىزدى قاستەرلەۋ ماقساتىندا وتكىزىلىپ وتىر» - دەي كەلە، جاڭعىرۋ جولىندا بابالاردان ميراس بولىپ قالعان ىزگى قاسيەتتەردى قايتا تۇلەتۋ قاجەتتىگىن ايتتى.

شارا اۋىلدىق مادەنيەت ۇيىندە ارىقبالىق شايقاسىنىڭ 160 جىلدىعىنا ارنالعان عىلىمي-تانىمدىق كونفەرەنسيامەن جالعاستى. كونفەرەنسيادا فيلولوگيا عىلىمدارىنىڭ كانديداتى، بولاشاق ۋنيۆەرسيتەتىنىڭ اعا وقىتۋشىسى، "ءالىمساق" جۋرنالىنىڭ باس رەداكتورى نۇرلان نۇرماحانوۆ «ارىقبالىق شايقاسى: جانقوجا باتىر اڭساعان ەركىندىكتىڭ، ۇرپاققا اماناتتاعان تاۋەلسىزدىكتىڭ سوڭعى ءدۇمپۋى»، №94 مەكتەپ ديرەكتورىنىڭ تاربيە ءىسى جونىندەگى ورىنباسارى ايزادا تاسىم «ارىقبالىق شايقاسى» تاقىرىپتارىندا بايانداما جاسادى.

اۋىلدىق ارداگەرلەر كەڭەسىنىڭ ءتوراعاسى ءالي شايقۇلجانقوجا باتىردىڭ ءوز عۇمىرىنان ەلىنىڭ نامىسىن ارتىق ساناعانىنا توقتالىپ، كوتەرىلىسكە قاتىسقان ساربازداردىڭ ەرلىگى دارىپتەۋگە تولىق لايىقتى ەكەنىن جەتكىزدى. شارا سوڭىندا جينالعان كوپشىلىككە كيىز ءۇي مەن ارنايى شاتىرلاردا اس بەرىلدى. ايتا كەتەيىك، قازالى بەكىنىسى تۇبىندە ورىس پاتشاسىنىڭ وزبىرلىعىنا قارسى جانقوجا باتىر باستاعان كوتەرىلىسكە 7 مىڭداي ادام قاتىسقان. اقتىق شايقاس 1857 جىلى 9 قاڭتاردا فيتينگوف باستاعان جازالاۋشى اسكەرمەن ارىقبالىق جەرىندە وتكەن.