وڭتۇستىك قازاقستان وبلىسىندا «ەكسپو-2017» حالىقارالىق مامانداندىرىلعان كورمەسىندەگى افريكا ەلدەرىنىڭ كورمە-جارمەڭكەسى اشىلدى، دەپ حابارلايدى Qamshy.kz اقپارات اگەنتتىگى وقو اكىمىنىڭ باسپا ءسوز قىزمەتىنە سىلتەمە جاساي وتىرىپ.

شىمكەنت قالاسىنىڭ «كورمە» ورتالىعىندا 10 قازانعا دەيىن  وتەتىن شارا ەكى ەل اراسىنداعى ءتۋريزمدى دامىتۋ، ينۆەستيسيالىق مۇمكىندىكتەرگە جول اشۋ، ىسكەرلىك قاتىناستاردى جاقسارتۋ ماقساتىندا وبلىس اكىمدىگىنىڭ قولداۋىمەن ۇيىمداستىرىلىپ وتىر.

كورمەنىڭ اشىلۋ سالتاناتىنا قاتىسقان وڭتۇستىك قازاقستان وبلىسىنىڭ اكىمى ج.تۇيمەبايەۆ افريكا ەلى قوناقتارىنا قوش كەلدىڭىزدەر دەي وتىرىپ، ولاردىڭ الىپ كەلگەن ونىمدەرىن تاماشالادى.

«حالىقارالىق كورمەدە قانشاما ەلدەر ءوز مادەنيەتتەرىن، ۇلتتىق وزىندىك ەرەكشەلىكتەرىن تانىتىپ وزدەرىنىڭ ەكونوميكالىق جانە تەحنولوگيالىق دامۋ دەڭگەيلەر مەن جەتىستىكتەرىن كورسەتتى. بۇگىنگى كۇنى وڭتۇستىك وڭىرىنە سول كورمەنىڭ ءبىر بولىگىن الىپ كەلىپ وتىرعان افريكا ەلىنە ۇلكەن العىسىمدى بىلدىرەمىن. بۇگىنگى كورمەنىڭ ءوتۋ ماقساتى، ءتۋريزمدى دامىتۋ، مۇمكىندىكتەرگە جول اشۋ، بيزنەستىك بايلانىستاردى جەتىلدىرۋ»،-دەدى اكىم.

كورمەدە افريكا قۇرلىعىنان كەلگەن بىرنەشە رەسپۋبليكا ءوز ونىمدەرىن كوپشىلىك نازارىنا ۇسىنىپ وتىر. ولار 20-دان استام كومپانيا مەن ەفيوپيا، كەنيا،  تانزانيا، گۆينەيا، گامبيا، سۋدان جانە يەمەن ەلدەرىنىڭ  قولونەر شەبەرلەرى.  افريكالىقتار جاڭا تەحنولوگيالارمەن قاتار، كوپشىلىككە كوتەرىڭكى كوڭىل-كۇي دە سىيلاي ءبىلدى.

كورمەدەگى  افريكا بازارىنان  قولونەر بۇيىمدارىن ساتىپ الۋ مۇمكىندىكتەرى بار. ولاردىڭ شاي، كوفە جانە قولتىراۋىن، پيتون تەرىسىنەن جاسالعان سومكەلەرى مەن كيىم-كەشەكتەرى ۇلكەن سۇرانىسقا يە.