قازاق مەكتەپتەرىنە ارنالعان كىتاپتار جايىندا داۋ-داماي حالىق اراسىندا كۇننەن-كۇنگە ۋشىعا تۇسۋدە. ولاردىڭ دالەلى رەتىندە الەۋمەتتىك جەلىدە جاريالانعان ءبىرقاتار ۆيدەوۇندەۋلەردى اتاۋعا بولادى، دەپ جازادى Qamshy.kz اقپارات اگەنتتىگى.

كەزەكتى ۆيدەودا 7-سىنىپقا ارنالعان وقۋلىقتاردىڭ ساپاسىن ونداعى قاتەلىكتەردى اشىپ كورسەتكەن.

Facebook ەەلىسىندە جاريالانعان بۇل ۆيدەودا 7-سىنىپ وقۋلىقتارىنىڭ ءبىرقاتارى قانداي دەڭگەيدە ەكەندىگى انىق كورسەتىلگەن. گەوگرافيا كىتابى 31ء-شى بەتتەن باستالىپ كەتىپ جاتسا، بيولوگيا وقۋلىعىنىڭ ءبىرىنىڭ مۇقاباسى تەرىس اينالدىرىپ تۇپتەلگەن، ال ءبىرىنىڭ ورتاسىندا ورىسشا تاقىرىپشالار قوسىلىپ كەتكەن.

الەۋمەتتىك جەلى قولدانۋشلارى ەرلان ساعادييەۆكە ارنايى ساۋال جولداپ: «مىنا سۇمدىققا كىم جاۋاپ بەرەدى، ساعادييەۆ مىرزا؟ مەنىڭشە بۇل ۇرپاققا ارنايى جاسالعان پروۆوكاسيا. بۇنىمەن پروكۋراتۋرا اينالىسۋ كەرەك، قىلمىس ءىستى اشىپ»، - دەپ جازادى كوپشىلىگى.

ءيا، راسىمەن دە ساپاسى سىن كوتەرمەيتىن مۇنداي وقۋلىقتارمەن كەلەشەكتە ءبىلىمدى جاستار تاربيەلەۋ قيىنعا سوعادى. ساپالى ءبىلىم بەرۋ ءۇشىن وقۋلىقتىڭ دا ساپاسى جوعارى دەڭگەيدە بولۋ قاجەت ەكەندىگى بەلگىلى.

اتالمىش ماسەلەلەرگە قاتىستى وقۋشىلاردىڭ اتا-انالارى وزدەرىنىڭ نارازىلىقتارىن ءبىلدىرىپ، الەۋمەتتىك جەلى قولدانۋشىلارى تۇرلىشە پىكىر بىلدىرۋدە.