اقتوبەدە قىركۇيەك ايى تۋعالى بەرى 13 وقۋشى قىز ورامالىن شەشتى. مەكتەپ فورماسىن ۇستانۋعا قاتىستى جۇمىستار ناتيجە بەرە باستادى، - دەپ حابارلايدى Qamshy.kz اقپارات اگەنتتىگى اقتوبە قالاسى اكىمىنىڭ باسپا ءسوز قىزمەتىنە سىلتەمە جاساي وتىرىپ.
اكىمدىكتىڭ مالىمەتى بويىنشا، اقتوبەدەگى ورتا ءبىلىم بەرەتىن مەكتەپتەرگە جاڭا وقۋ جىلىندا 170 وقۋشى قىز ورامال تاعىپ كەلگەن.
"مەكتەپ فورماسىن ساقتاۋ قاجەتتىلىگى تۋرالى زاڭنامانىڭ تالاپتارىن ەسكەرە وتىرىپ، مەكتەپ باسشىلارى مەن سىنىپ جەتەكشىلەرى وسى ماسەلە بويىنشا اتا-انالار اراسىندا ءتۇسىندىرۋ جۇمىستارىن جۇرگىزدى. بۇل جۇمىس ءالى دە جالعاسا بەرەدى" - دەيدى اكىمدىكتىڭ باسپا ءسوز قىزمەتى.
اقتوبە وبلىستىق ءدىن ىستەرى دەپارتامەنتىنىڭ باسشىسى جولداس قالماعامبەتوۆتىڭ دەرەگى بويىنشا، اقتوبە وبلىسىنداعى ورتا ءبىلىم بەرەتىن مەكتەپتەرگە جالپى سانى 370 وقۋشى ورامال تارتىپ كەلگەن.
ءبىلىم جانە عىلىم مينيسترلىگى بىلتىرعى وقۋ جىلىنىڭ ورتاسىندا مەكتەپتە قانداي دا ءبىر ءدىندى ناسيحاتتايتىن كيىم كيۋگە تىيىم سالاتىن قاۋلى شىعارعان. بيىل وقۋ جىلىندا اقتوبە، جاڭاوزەن مەن شالقار قالالارىندا جانە وڭتۇستىك قازاقستان وبلىسىنداعى ماقتارال قالالارىندا بۇيرىققا سۇيەنگەن مەكتەپ باسشىلارى ورامال تاققان وقۋشى قىزداردى مەكتەپتە كىرگىزبەي جاتىر.
