قىرعىزستان پرەزيدەنتى المازبەك اتامبايەۆ الداعى وتپەك پرەزيدەنتتىك سايلاۋدىڭ قىرعىزستان ءۇشىن تاريحي ماڭىزى زور ەكەنىن، سونداي-اق مەملەكەتتىڭ تۇراقتىلىعىن نىعايتىپ، ودان ءارى ساقتاپ قالۋعا سەپتىگىن تيگىزەتىن ۇلكەن قادام ەكەنىن ايتتى، دەپ جازادى Qamshy.kz اقپارات اگەنتتىگى.

ونىڭ ايتۋىنشا، تازا ءارى ءادىل سايلاۋ وتكىزۋ اسا ماڭىزدى، سەبەبى ەل اراسىندا سايلاۋ ناتيجەلەرىنە قاتىستى ەش كۇمان بولماۋ كەرەك. بۇل تۋرالى ەل باسشىسى ۆيسە-پرەمەر-مينيستر تەمىر جۇماقادىروۆ جانە ورتالىق اتقارۋ كوميتەتىنىڭ ءتوراعاسى نۇرجان شايلدابەكوۆانى قابىلداعاندا ايتقان، دەپ حابارلايدى پرەزيدەنت اپپاراتى.

قىرعىزستاندا كەزەكتى پرەزيدەنت سايلاۋى 15 قازاندا وتەدى. المازبەك اتامبايەۆتىڭ وكىلەتتەلىك مەرزىمى 1 جەلتوقساندا اياقتالادى.

ايتا كەتەيىك، قازاقستان پرەزيدەنتى نۇرسۇلتان نازاربايەۆ 19 قىركۇيەكتە قىرعىزستان پرەزيدەنتتىگىنە ۇمىتكەر ومىربەك بابانوۆپەن الماتىدا كەزدەسكەن.

كەزدەسۋ بارىسىندا ەكىجاقتى ىنتىماقتاستىقتى ودان ءارى نىعايتۋ ماسەلەلەرى تالقىلانعان.

ەلباسى قىرعىزستاننىڭ پرەزيدەنتتەرىمەن جاقسى قارىم-قاتىناستا بولعاندىعىن، قىرعىز حالقى سەنىم ءبىلدىرىپ، جاڭادان سايلايتىن پرەزيدەنتپەن دە ءتيىمدى ءىس-قيمىل قالىپتاستىراتىنىن ءمالىم ەتكەن.  

ءوز كەزەگىندە قىرعىزستان بيلىگى نازاربايەۆتىڭ ومىربەك بابانوۆپەن كەزدەسكەنىنە نارازى ەكەندىگىن ءبىلدىردى. قىرعىز تاراپى اتالمىش كەزدەسۋدى قازاقستاننىڭ قىرعىزستاندا وتپەك پرەزيدەنتتىك سايلاۋىنا قانداي دا ءبىر اسەر قالدىرۋ قادامىنا بالاپ، ەلدىڭ ىشكى ساياساتىنا ارالاسۋ دەپ سانادى.