قىرعىزستاندا سايلاۋ جانە رەفەرەندۋم وتكىزۋ جونىندەگى ورتالىق سايلاۋ كوميسسياسى قىرعىزستان پرەزيدەنتتىگىنە ۇمىتكەر ومىربەك بابانوۆتىڭ قازاقستان پرەزيدەنتى نۇرسۇلتان نازاربايەۆپەن كەزدەسۋىنە باعا بەردى، دەپ جازادى Qamshy.kz اقپارات اگەنتتىگى. بۇل تۋرالى ورتالىق اتقارۋ كوميتەتىنىڭ ءتوراعاسى نۇرجان شايلدابەكوۆا «ازاتتىق» تىلشىسىنە بەرگەن سۇحباتىندا ايتتى.

ونىڭ ايتۋىنشا، «سايلاۋ» تۋرالى زاڭنىڭ 28-بابىندا ۇمىتكەرلەرگە شەتەلدىك ساياسي تۇلعالاردىڭ ۇگىت-ناسيحاتىن پايدالانۋعا تىيىم سالىنعان. الايدا ورتالىق اتقارۋ كوميتەتىنىڭ جۇمىس توبى اتالمىش كەزدەسۋ جايىندا قازاقستان باسشىسىنىڭ باسپا ءسوز قىزمەتى اقپارات رەتىندە جازعاندىقتان، مۇندا ەشقانداي دا زاڭ بۇزۋشىلىقتىڭ بولماعانىن ايتادى. ءتوراعانىڭ ءوزى «زاڭ بۇزۋشىلىق ورىن الدى» دەيدى.

«مەنىڭشە، بۇل – جاۋاپكەرشىلىكتەن قاشۋعا يتەرمەلەيتىن ناعىز ىس-ارەكت. بابانوۆتىڭ قازاقستان پرەزيدەنتىمەن كەزدەسۋىن زاڭ بۇزۋشىلىق دەپ بىلەمىن»، – دەدى  شايلدابەكوۆا.

ونىڭ سوزىنشە، ءوزىن جوعارعى لاۋازىمعا ۇسىنىپ وتىرعان ادام مورالدىق تازالىق پەن جاۋاپكەرشىلىكتىڭ ۇلگىسى بولۋى كەرەك.

ايتا كەتەيىك، 19 قىركۇيەكتە اقوردانىڭ باسپا ءسوز قىزمەتى الماتىدا نۇرسۇلتان نازاربايەۆتىڭ «رەسپۋبليكا – اتا-جۇرت» پارتياسىنىڭ باسشىسى جانە قىرعىزستان پرەزيدەنتتىگىنە ۇمىتكەر ومىربەك بابانوۆپەن كەزدەسكەنىن جاريالاعان.

كەلەسى كۇنى قىرعىزستان سىرتقى ىستەر مينيسترلىگى قازاقستانعا نارازىلىق نوتاسىن جىبەردى. بىشكەك نازاربايەۆتىڭ قىرعىزستان پرەزيدەنتتىگىنە ۇمىتكەر بابانوۆپەن كەزدەسۋىن «قىرعىزستاننىڭ ىشكى ىستەرىنە ارالاسۋى جانە سايلاۋعا ىقپال ەتۋ» ارەكەتىنە بالادى.

قازاقستان تاراپى ءوز كەزەگىندە قىرعىزستان ءسىم رەاكسياسىنا تاڭ قالعانىن جەتكىزدى. استانا ەلباسىنىڭ ومىربەك بابانوۆپەن كەزدەسۋدە ەشقانداي ىقپال جاساۋ ارەكەتى بولماعانىن جەتكىزدى.