ەلوردادا ءبىرقاتار مەديسينالىق مەكەمەلەردە كارديولوگ، نيەۆروپاتولوگ، وكۋليست، تراۆماتولوگ سەكىلدى ماماندار تاپشى. وسىعان بايلانىستى تۇرعىنداردىڭ كوبى جەكە پوليكنيكالارعا جۇگىنەدى. بۇل تۋرالى استانا راديوسىنىڭ «قالا تىنىسى» باعدارلاماسىندا دەنساۋلىق ساقتاۋ باسقارماسىنىڭ باسشىسى كامالجان نادىروۆ مالىمدەدى.

سونداي-اق قالادا 73 مىڭ تۇرعىن تۇماۋعا قارسى ەكپەنى تەگىن قابىلدايدى. ەڭ الدىمەن بالالار، جۇكتى ايەلدەر، مەديسينالىق قىزمەتكەرلەر قامتىلادى.

جىل باسىنان بەرى 84 مەكتەپتەگى مەديسينالىق قىزمەت كورسەتۋ دەنساۋلىق ساقتاۋ باسقارماسىنا بەرىلگەن ەدى. ولاردىڭ 20 پايىزىنىڭ مەديسينالىق قىزمەتتى جۇزەگە اسىرۋعا بەرىلەتىن رۇقسات قاعازى بولمادى. دەگەنمەن، بۇگىندە بۇل ماسەلە شەشىلدى.

دەنساۋلىق ساقتاۋ باسقارماسىنىڭ مالىمەتىنە سۇيەنسەك، جۋىردا عانا ەلوردالىق 73 مەكتەپ «مەكتەپ دەنساۋلىعى» جابدىقتارىمەن قامتاماسىز ەتىلگەن.

سونىمەن قاتار كامالجان نادىروۆ ەفير بارىسىندا ەلەكتروندى دەنساۋلىق پاسپورتى جىل سوڭىنا دەيىن ەنگىزىلەتىنىن حابارلادى.

گۇلميرا ايماعانبەت