ق ر ەڭبەك جانە حالىقتى الەۋمەتتىك قورعاۋ مينيسترلىگى 2018 جىلعا ارنالعان قازاقستانداعى جۇمىس ۋاقىتىنىڭ كۇنتىزبەسىن جاريالادى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ.

«قازاقستان رەسپۋبليكاسىنداعى مەرەكەلەر تۋرالى» قازاقستان رەسپۋبليكاسىنىڭ 2001 جىلعى 13 جەلتوقسانداعى № 267 زاڭىنا (بۇدان ءارى - زاڭ) سايكەس قازاقستان رەسپۋبليكاسىنداعى ۇلتتىق جانە مەملەكەتتىك مەرەكەلەر اتاپ وتىلەتىن كۇندەر قازاقستان رەسپۋبليكاسىنىڭ ەڭبەك زاڭناماسىنا سايكەس مەرەكە كۇندەرى دەپ تانىلادى. قازاقستان رەسپۋبليكاسىنداعى مەرەكە كۇندەرى جۇمىس كۇندەرىنە كىرمەيدى. دەمالىس جانە مەرەكە كۇندەرى سايكەس كەلگەن جاعدايدا مەرەكەدەن كەيىنگى جۇمىس كۇنى دەمالىس كۇنى بولىپ تابىلادى.

قازاقستان رەسپۋبليكاسىنداعى اتاپ وتىلەتىن مەرەكە كۇندەرىنە توقتالاتىن بولساق، ۇلتتىق مەرەكە: 16-17 - جەلتوقسان - تاۋەلسىزدىك كۇنى؛ مەملەكەتتىك مەرەكەلەر: 1-2 قاڭتار - جاڭا جىل؛  8 ناۋرىز - حالىقارالىق ايەلدەر كۇنى؛ 21-23 ناۋرىز - ناۋرىز مەيرامى؛ 1 مامىر - قازاقستان حالقىنىڭ بىرلىگى مەرەكەسى؛ 7 مامىر - وتان قورعاۋشى كۇنى؛ 9 مامىر - جەڭىس كۇنى؛ 6 شىلدە - استانا كۇنى؛ 30 تامىز - قازاقستان رەسپۋبليكاسىنىڭ كونستيتۋسياسى كۇنى؛ 1 جەلتوقسان - قازاقستان رەسپۋبليكاسىنىڭ تۇڭعىش پرەزيدەنتى كۇنى.

وسىعان وراي، 2018 جىلعى جۇمىس ۋاقىتىنىڭ بالانسىن قۇرۋ كەزىندە زاڭنىڭ نورمالارىن ەسەپكە الا وتىرىپ، دەمالىس كۇندەرىنە (سەنبى، جەكسەنبى) سايكەس كەلەتىن مەرەكە كۇندەرى مەرەكەدەن كەيىنگى جۇمىس كۇنىنە اۋىستىرىلدى. بۇل تۇرعىدا بەس كۇندىكتە: 1 قاڭتاردان 3 قاڭتارعا؛ 16 جەلتوقساننان 18 جەلتوقسانعا. ال التى كۇندىكتە: 16 جەلتوقساننان 18 جەلتوقسانعا.

اتاپ ايتقاندا، مۇسىلمان كۇنتىزبەسى بويىنشا اتاپ وتىلەتىن قۇربان ايتتىڭ ءبىرىنشى كۇنى، 7 قاڭتار - پراۆوسلاۆيەلىك روجدەستۆو دەمالىس كۇندەرى بولىپ تابىلادى. 2018 جىلى قۇربان ايتتىڭ ءبىرىنشى كۇنى 21 تامىزعا تۋرا كەلەدى.

كودەكستىڭ 84-بابىنا سايكەس بەس كۇندىك جانە التى كۇندىك جۇمىس اپتاسىندا جەكسەنبى جالپى دەمالىس كۇنى بولىپ تابىلادى. بەس كۇندىك جۇمىس اپتاسىنداعى ەكىنشى دەمالىس كۇنى ۇجىمدىق شارتتا نەمەسە ەڭبەك تارتىپتەمەسى قاعيدالارىندا بەلگىلەنەدى.

2015 جىلعى 23 قاراشاداعى قازاقستان رەسپۋبليكاسى ەڭبەك كودەكسىنىڭ 68- بابىندا جۇمىس ۋاقىتىنىڭ قالىپتى ۇزاقتىعى اپتاسىنا 40 ساعاتتان اسپاۋعا ءتيىس دەپ كوزدەلگەن. ەڭبەك شارتىندا جۇمىس ۋاقىتىنىڭ قالىپتى ۇزاقتىعى ءۇشىن تولەنەتىندەي تولەماقىمەن ۇزاقتىعى ازىراق جۇمىس ۋاقىتى كوزدەلۋى مۇمكىن.

سونداي-اق كودەكستە قىزمەتكەرلەردىڭ جەكەلەگەن ساناتتارى ءۇشىن جۇمىس ۋاقىتىنىڭ قىسقارتىلعان ۇزاقتىعىن بەلگىلەۋ كوزدەلگەن: ون ءتورت جاستان ون التى جاسقا دەيىنگى قىزمەتكەرلەر ءۇشىن - اپتاسىنا 24 ساعاتتان اسپايتىن؛ ون التى جاستان ون سەگىز جاسقا دەيىنگى قىزمەتكەرلەر ءۇشىن - اپتاسىنا 36 ساعاتتان اسپايتىن (كودەكستىڭ 69-بابى)؛ اۋىر جۇمىستاردا، ەڭبەك جاعدايلارى زياندى (ەرەكشە زياندى) جانە (نەمەسە) ءقاۋىپتى جۇمىستاردا ىستەيتىن قىزمەتكەرلەر ءۇشىن اپتاسىنا 36 ساعاتتان اسپايتىن؛ ءبىرىنشى جانە ەكىنشى توپتاعى مۇگەدەك قىزمەتكەرلەرگە اپتاسىنا 36 ساعاتتان اسپايدى.

كودەكستىڭ 79-بابىنا سايكەس، ۇيىمداردا قىزمەتكەردىڭ ناقتى جۇمىس ىستەگەن قىزمەت ۋاقىتىن ەسەپكە الۋ جۇزەگە اسىرىلۋعا ءتيىس.

بەس كۇندىك جۇمىس اپتاسى كەزىندە كۇندەلىكتى جۇمىستىڭ (جۇمىس اۋىسىمىنىڭ) ۇزاقتىعى اپتالىق نورما 40 ساعات بولعاندا - 8 ساعاتتان، اپتالىق نورما 36 ساعات بولعاندا - 7 ساعات 12 مينۋتتان اسپاۋعا ءتيىس؛ التى كۇندىك جۇمىس اپتاسى كەزىندە كۇندەلىكتى جۇمىستىڭ (جۇمىس اۋىسىمىنىڭ) ۇزاقتىعى اپتالىق نورما 40 ساعاتقا تەڭ بولعاندا - 7 ساعاتتان، اپتالىق نورما 36 ساعات بولعاندا - 6 ساعاتتان اسپاۋعا ءتيىس جانە ت.ب.

وسىعان بايلانىستى جۇمىس ۋاقىتىنىڭ ۇزاقتىعى تومەندەگىنى قۇرايدى: 40 ساعاتتىق جۇمىس اپتاسىندا: بەس كۇندىك جۇمىس اپتاسى كەزىندە - 8 ساعاتتان بەس جۇمىس كۇنى؛ التى كۇندىك جۇمىس اپتاسى كەزىندە - 7 ساعاتتان بەس جۇمىس كۇنى جانە ۇزاقتىعى 5 ساعات بولاتىن ءبىر جۇمىس كۇنى. 36 ساعاتتىق جۇمىس اپتاسىندا: بەس كۇندىك جۇمىس اپتاسى كەزىندە - 7 ساعات 12 مينۋت بولاتىن (7،2 ساعات) بەس جۇمىس كۇنى؛ التى كۇندىك جۇمىس اپتاسى كەزىندە - 6 ساعاتتان التى جۇمىس كۇنى.

وندىرىستىك كۇنتىزبەدە اي، توقسان جانە 2018 جىلدىڭ تۇتاستاي جۇمىس كۇندەرى (ساعاتتارى) بويىنشا جۇمىس ۋاقىتىنىڭ نورماسى كەلتىرىلگەن. ول 40 ساعاتتىق جانە 36 ساعاتتىق جۇمىس اپتاسىندا سەگىز، جەتى جانە التى ساعاتتىق جۇمىس كۇنىنىڭ نەگىزىندە بەس كۇندىك جانە التى كۇندىك جۇمىس اپتاسىنىڭ كۇنتىزبەسى بويىنشا ەسەپتەلگەن.

2018 جىلى جۇمىس ۋاقىتىنىڭ نورماسىنا توقتالساق، 40 ساعاتتىق جۇمىس اپتاسىندا: بەس كۇندىك - 1 968 ساعاتتى (246 كۇن * 8،00 ساعات)؛ التى كۇندىك - 1 984 ساعاتتى (247 كۇن * 7،00 ساعات+ 51 كۇن * 5،00 ساعات).

36 ساعاتتىق جۇمىس اپتاسىندا: بەس كۇندىك - 1 771،2 ساعاتتى (246 كۇن * 7،20 ساعات)؛ التى كۇندىك - 1 788 ساعاتتى (298 كۇن * 6،00 ساعات) قۇرايدى.

2018 جىلعا ارنالعان جۇمىس كۇندەرىنىڭ ورتاشا ايلىق سانى: بەس كۇندىك جۇمىس اپتاسىندا  - 20،5 كۇندى؛  التى كۇندىك جۇمىس اپتاسىندا  - 24،83 كۇندى قامتيدى.

2018 جىلعا ارنالعان كۇنتىزبەلىك كۇندەردىڭ ورتاشا ايلىق سانى (قازاقستان رەسپۋبليكاسىنىڭ زاڭناماسىندا بەلگىلەنگەن مەرەكە كۇندەرىن قوسپاعاندا) 29،25ء-تى قۇرايدى.