رەسەيدە ءىرى كولەمدە جول اپاتى ورىن الدى. ۆلاديمير وبلىسى پاكروۆكا ەلدى مەكەنىندە ماسكەۋدەن شىمكەنتكە ودان ءارى وزبەكستانعا بەت العان اۆتوبۋس تەمىر جول  وتكەلىندە ساعات تاڭعى 3.39 شاماسىندا اپاتقا ۇشىراعان. قازاقستاندىق ءنومىرلى «مەرسەدەس» ماركالى اق اۆتوبۋس وتكەلگە جەتكەن ساتتە ماتورى ءوشىپ قالادى. بۇل ۋاقىتتا بارلىق جولاۋشىلار ۇيىقتاپ جاتقان. اۆتوبۋس جۇرگىزۋشىسى 15 ادامدى وياتىپ، اۆتوبۋستى جىلجىتپاق بولعان، الايدا سول ۋاقىتتا پويىزدىڭ كەلە جاتقانى جايلى حاباردى ەستىگەن. اۆتوبۋستىڭ سىرتىندا بولعان جولاۋشىلار جان-جاققا قاشىپ ۇلگەرگەن، ال پويىز اۆتوبۋستىڭ بۇيىرىنەن سوققىلاپ، بولشەكتەپ تاستاعان. بۇل تۋرالى Qamshy.kz اقپارات اگەنتتىگى life.ru مالىمەتىنە سۇيەنىپ حابارلايدى. 

سوڭعى مالىمەتتەر بويىنشا اۆتوبۋستىڭ ىشىندە 57 ادام بولعان: قازاقستاندىق 2 جۇرگىزۋشى مەن وزبەكستاندىق 55 جۇمىسشى. ولاردىڭ ىشىندە بالالار دا بولعان. ءقازىر ۆلاديمير اۋدانىنىڭ دارىگەرلرى 2 بالانىڭ ءومىرى ءۇشىن كۇرەسىپ جاتىر.  بۇل تۋرالى وقيعا ورىن العان اۋداننىڭ اكىمى سۆەتلانا ورلوۆا حابارلادى.

جۇرگىزۋشىلەردىڭ بىرەۋى وقيعا ورنىندا كوز جۇمعان. تەرگەۋشىلەر ەكىنشى جۇرگىزۋشى اپاتتىڭ ءمان –جايىن ايتىپ بەرەدى دەپ ۇمىتتەنىپ وتىر.

سوڭعى مالىمەتتەر بويىنشا، قازاقستاندىق ەكى جۇرگىزۋشىنىڭ بىرەۋى – دانيار شىلدەبايەۆ. ول 1970 جىلى دۇنيەگە كەلگەن. وقيعا ورنىندا قايتىس بولدى. ەكىنشىسى – نۇرعالي سارمانوۆ. 1977 جىلى دۇنيەگە كەلگەن.

رەسەيلىك تەرگەۋشىلەر قازاقستاندىق اۆتوبۋستىڭ جانە وزبەكستان ازاماتتارىنىڭ رەسەيگە نە ءۇشىن كەلگەنىن انىقتاپ جاتىر.