قىتايلىق تۇرعىن سمارتفوندا ۇزدىكسىز ويىن وينايمىن دەپ ءبىر كوزى كورمەي قالدى، دەپ حابارلايدى Qamshy.kz اقپارات اگەنتتىگى شەتەلدىك باق-قا سىلتەمە جاساپ.

دەرەكتەرگە سايكەس، 21 جاستاعى بويجەتكەن كۇنى بويى توقتاماي سمارتفوندا ويىن ويناعان، سالدارىنان كوزى كورمەي قالدى. دارىگەرلەر وعان وڭ كوزىنىڭ تامىرى جارىلىپ كەتكەن دەگەن دياگنوز قويدى.

قىتايلىق قىزدىڭ ايتۋىنشا، ول ويىنعا قاتتى بەرىلىپ كەتكەن، جۇمىستان كەيىن جانە دەمالىس كۇندەرى ۇزدىكسىز ويناۋدى ادەتكە اينالدىرعان ەكەن.

«دەمالىس كۇندەرى مەن، ادەتتە، تاڭعى ساعات 6-دا تۇرىپ الامىن دا كەشكى 4-كە دەيىن ۇزدىكسىز وينايتىنمىن. كەيىن تاماق ءىشىپ الىپ، ازداپ ۇيىقتاپ الامىن دا، تۇرعاننان سوڭ تۇنگە دەيىن تاعى ويىن وينايتىنمىن. سمارتفونداعى ويىنعا بايلانعانىم سونشالىق، كەيدە ءتىپتى تاماق ءىشۋدى دە ۇمىتىپ كەتەتىنمىن»، - دەيدى ول.

دارىگەرلەردىڭ ايتۋىنشا، كوز اۋىرىنا قاتىستى مۇنداي دياگنوز نەگىزىنەن ەگدە جاستاعى ادامداردا بولادى، ال جاستاردا كوپ كەزدەسە بەرمەيدى. ال قىزدىڭ سوقىر بولىپ قالۋىنىڭ سەبەبى – كوزىنە كوپ اۋىرلىق تۇسكەن.