ءسىز قاشان دا مۋزىكا تىڭداعاندا دەنەڭىزدەگى شاش تالشىقتارى تۇرىپ كەتكەن كەزدى ەسىڭىزگە الا الاسىز با؟

مەتيۋ ساشس ەسىمدى گارۆارد ۋنيۆەرسيتەتىنىڭ تۇلەگى وتكەن جىلى مۋزىكا تىڭداپ وتىرعان ادامداردىڭ قانداي سەزىمدە بولاتىندىعىن زەرتتەدى، -دەپ جازادى Qamshy.kz اقپارات اگەنتتىگى. 

تاجىريبەگە 20 ستۋدەنت قاتىسىپ، ونىڭ 10-ى مۋزىكا تىڭداعاندا ەرەكشە كۇيگە بولەنىپ، دەنەلەرى تۇرشىگەتىنىن ايتقان.  سوندىقتان، عالىم ولاردىڭ ميلارىن سكانەرگە ءتۇسىردى.

ول مۋزىكاعا ەموسيونالدى جانە فيزيكالىق تۇرعىدا بايلانعان ادامداردىڭ مي قۇرىلىسى - ەشقانداي ەموسيا بىلدىرمەگەندەردىڭ ميىنا قاراعاندا وزگەشە ەكەندىگىن انىقتاعان.
زەرتتەۋلەر كورسەتكەندەي، ەرەكشە مي قۇرىلىسىنا يە ادامدار  وزدەرىنىڭ ەستۋ قابىعىن جانە ەموسيالاردى وڭدەيتىن ايماقتاردى بايلانىستىراتىن تالشىقتاردىڭ تىعىزدىعىن ارتتىرۋعا بەيىم. سوندىقتان ول ەكى مۇشە بىر-بىرىمەن جاقسى قارىم-قاتىناس ورناتا الادى.

ساشس-تىڭ زەرتتەۋ ناتيجەسى «وكسفورد اكادەميك» عىلىمي جۋرنالىنا جارىق كوردى.
جۋرنالدان مىناداي ءۇزىندى كەلتىرەيىك: «ەستۋ مۇشەسى مەن ەموسيالاردى وڭدەيتىن ايماقتاردىڭ اراسىنداعى تالشىقتار ونىمدىلىگىن جوعارىلاتۋدىڭ ارقاسىندا ءتيىمدى وڭدەۋدەن وتەدى».

بۇل مالىمدەمەگە سايكەس، ەگەر مۋزىكا ءسىزدىڭ كوڭىل-كۇيىڭىزگە اسەر ەتە السا، وندا ءسىز وتە مىقتى ەموسيالىق قاسيەتكە يەسىز.

وعان قوسا، ول سەزىمدەردىڭ بولۋى مۋزىكامەن بايلانىستى ەستە قالعان ساتتەرمەن تىعىز بايلانىستى.

تاجىريبە جاسالعان ادامداردىڭ سانى از بولعانمەن، ساشس ءالى دە بۇل جاڭالىعىن ءارى قاراي زەرتتەمەك ويى بار. ونىڭ پىكىرىنشە، بۇل زەرتتەۋ پسيحولوگيالىق اۋىتقۋلارى بار جانداردى ەمدەۋگە سەپتىگىن تيگىزەدى.