وسىدان ءبىراز ۋاقىت بۇرىن قىتايداعى قازاقتىڭ ءبىر وتار قويىنا قاسقىر شاپقان. سول كەزدە قىتايداعى قانداسىمىز قاسقىردى جالاڭ قولمەن سۇلاتىپ، ونىڭ اۋزىن جىپپەن بايلاپ ءوز ۇيىنە اكەلىپتى. فەيسبۋك قولدانۋشىسى بۋراحان داكانوۆ وسى وقيعانىڭ قالاي بولعاندىعىن ءوز پاراقشاسىنا جازعان. 

كەشەلەرى ما، ودان ارعى كۇنى ما بىلمەدىم، ايتەۋىر بولاشاقتا وزىمىزگە قايتاتۇعىن قىتايداعى قازاقتىڭ ءبىر جەرىندە  ءومىر ءسۇرىپ جاتقان سۋرەتتەگى قانداسىمىزدىڭ ءبىر وتار قويىنا اياق استىنان قاسقىر شاۋىپتى. ءبىر توقتىنى الىپ، كەتە بەرسە جارايدى عوي. جوق. قاسقىرىڭ قالىڭ قويعا قىرعيداي تيگەن كورىنەدى.ونىمەن قوسا شوپانعا قىر كورسەتىپ:

— قىلاتىنىڭدى قىلىپ ال دەگەندەي ىرجالاڭداعان دەيدى... بۇنداي جاعدايدا ەسىنەن اداسپاعان جىگىتىڭ: 

— ەەە.. قاسقىر بولساڭ يت شىعارسىڭ. سىعىپ تاستار بيت شىعارسىڭ، كەلسەڭ كەل ناق!! ءوتىڭدى الىپ ..وتىڭە قۇيايىن، —  دەپ ەشقانداي قارۋسىز، تۇپ-تۋرا 38 مينۋت الىسقان ەكەن. قاسقىردىڭ ادامعا شاپقانىن ەستىگەن ءبورى — قاسقىرعا "شاپقان" ادامدى كورگەندە تاڭ قالىپ، ءبىر ءتۇرلى بولىپ قالعان سەكىلدى.

دەگەنمەن جان كەرەك، ونىمەن قوسا قاسقىر دەگەن اتى بار، ايتەۋىر جانتالاسىپ ءجۇرىپ الگى باتىردىڭ ءۇش ساۋساعىن جۇلىپ ۇلگەرەدى. يت سەكىلدى بىردەمەنىڭ ساۋساعىن تاماق ەتكەنىنە نامىستانعان ءھام اشۋدى ات سەكىلدى ەرتتەپ مىنگەن جىگىتىڭ  ءبورىڭدى باستان ءبىر تەۋىپ قۇلاتادى دا، ونىمەن قويماي اۋزىن جىپپەن بايلاپ، ءتۇز تاعىسىن يت قىلىپ ۇيىنە الىپ كەلگەن. كورشى قولاڭ ەسىنەن تانىپ جاتىر دەيدى شەتىنەن. ونى قويشى، كورشى-قولاڭ تۇگىل مىڭداعان شاقىرىم الىستا جاتقان ءبىزدىڭ ءوزىمىز توسەكتە ءبىر اۋدارىلىپ قالدىق. جارايسىڭ قىسقاسى!!!

بۋراحان داكانوۆتىڭ  فەيسبۋك پاراقشاسىنان الىنعان