ساياساتتانۋشى ەرلان قارين قىرعىز رەسپۋبليكاسىنىڭ پرەزيدەنتى المازبەك اتامبايەۆتىڭ سوزدەرىنە بايلانىستى ءوزىنىڭ پىكىرىن فەيسبۋكتەگى پاراقشاسى ارقىلى ءبىلدىردى،— دەپ حابارلايدى Qamshy.kz اقپارات اگەنتتىگى.
«قىرعىز پرەزيدەنتىنىڭ بۇگىنگى مالىمدەمەسى قازاقستان جانە ونىڭ باسشىلارى اتىنا كۇيە جاعۋ ارەكەتتەرىن جالعاستىردى. وكىنىشكە وراي، اتقا كىر كەلتىرۋ ارەكەتتەرى كۇشەيىپ كەلەدى. سوڭعى كۇندەرى ايتىلعان سىندار ۇيىمداستىرۋ سيپاتىنا يە بولىپ، وعان زيالى قاۋىم وكىلدەرى قوسىلدى»، — دەپ جازادى ەرلان قارين.
«الايدا قازاقستاندىق اقپارات الاڭدا مۇنداي ارانداتۋشىلىق نەمەسە تاپسىرىسپەن جازىلعان اقپاراتتارعا جاۋاپ بولعان جوق. بۇل دۇرىس تا، ويتكەنى قانداي دا ءبىر ارانداتۋشىلىقتارعا بارۋ جاقسىلىققا اپارماسى انىق. ءبىزدىڭ ەلدە مەملەكەتارالىق قارىم-قاتىناس ءبىر ساتتىك عانا ساياسي مىندەتتەردەن ءارقاشان جوعارى قويىلىپ كەلەدى»،— دەيدى ساياساتتانۋشى.
«الايدا بولىپ جاتقان سوڭعى جاعدايلاردى بايقاي وتىرىپ، قىرعىزستان پرەزيدەنتى اكىمشىلىگى قازاقستاندىق فاكتوردى ساياسي تەحنولوگيالىق قۇرال رەتىندە پايدالانۋدى، ال پاتريوتتىق كوڭىل-كۇيدى جاساندى قوزدىرۋ ارقىلى بيلىككە ۇمىتكەردىڭ اينالاسىنا ەلەكتوراتتاردى جۇمىلدىرۋ جانە شوعىرلاندىرۋدى ويلاستىرعانعا ۇقسايدى. كوپشىلىك جاعدايدا مەملەكەتارالىق قارىم-قاتىناستار ساياسي تەحنولوگيانىڭ قۇربانىنا ءجيى ءارى جەڭىل اينالىپ جاتادى»، — دەپ جازادى قارين.
«ءبىر قۋانتارلىق جايت، قىرعىز قوعامىندا «ەسسىزدىككە» جول بەرۋ، جوعارىدان بەرىلگەن تاپسىرمانى مۇلتىكسىز ورىنداۋ فاكتورلارى بايقالمايدى. ەڭ باستىسى قاراپايىم حالىق بۇل سايلاۋ قۇيتىرقىلارى ەكەندىگىن جاقسى تۇسىنەدى. سوندىقتان دا ءبىز سايلاۋ تەزىرەك ءوتىپ، ەكى باۋىرلاس ەلدىڭ ساياساتى تەك ناقتى پروبلەمالار مەن كۇن تارتىبىندەگى وزەكتى ماسەلەلەرمەن اينالىسسا ەكەن دەپ ۇمىتتەنەمىز»، — دەپ قورىتىندىلادى ءوز ءسوزىن ەرلان قارين.
