ءونىمسىز ءوزىن-وزى جۇمىسپەن قامتىلعان 1،4 ميلليون ادام بەلگىلى بولدى. بۇل تۋرالى ماجىلىستەگى ۇكىمەت ساعاتىندا ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ءمالىم ەتتى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.

«ەڭبەك شارتتارى كولەمىنىڭ ارتقانىنا قاراماستان، بەيرەسمي شارتتار دا ساقتالۋدا جانە بۇل جايت ايتارلىقتاي الاڭداتىپ وتىر. سوڭعى ەكى جىلدا ەڭبەك ينسپەكتورلارى جۇمىسشىلاردىڭ قىزمەتىن ەڭبەك شارتىنسىز پايدالانعان ءبىر مىڭنان استام جۇمىس بەرۋشىنى انىقتادى. وسى ورايدا بۇل جاعداي كوبىنەسە بىلىكتىلىگى تومەن جۇمىسشىلارعا قاتىستى بولۋدا، ياعني قۇرىلىستا، ساۋدادا، قوعامدىق تاماقتانۋ ورىندارىندا، اۋىل شارۋاشىلىعىندا جانە شاعىن بيزنەستە جۇمىسپەن قامتىلعاندارعا بايلانىستى. اعىمداعى جىلى ءۇي-ۇيدى ارالاۋ جولىمەن بەيرەسمي جۇمىسقا باعا بەرىلدى. وسى شارامەن 5،6 ميلليون ادام قامتىلدى. ناتيجەسىندە، 2،2 ميلليون ادامنىڭ مارتەبەسى وزەكتەندىرىلدى. زەينەتاقىلىق جارنانى بولمەي جۇرگەن، دەگەنمەن دە جۇمىسپەن قامتىلعان ءبىر ميلليونعا تارتا ادام انىقتالدى. مۇنىمەن قوسا، تىركەلمەگەن جۇمىسسىز 320 مىڭ ادام جانە ءتيىمسىز ءوزىن-وزى جۇمىسپەن قامتىعان 1،4 ميلليون بەلگىلى بولدى»، - دەدى دۇيسەنوۆا.

ونىڭ سوزىنە قاراعاندا، قازىرگى ۋاقىتتا ۇكىمەت جەرگىلىكتى اتقارۋشى ورگاندارمەن بىرلەسە اتالعان ماسەلەلەر تۇرعىسىندا كەشەندى جوسپاردى ازىرلەۋدە. وسىنىڭ اياسىندا جۇمىس ىستەپ جۇرگەن تۇعىنداردى راسىمدەۋ بويىنشا  جۇيەلىك شارالاردى قابىلداۋ، اقپاراتتىق جۇيەلەردە مالىمەتتەردى وزەكتى ەتۋ ماسەلەسى ەسكەرىلىپ وتىر.