الماتىدا ۇشتى-كۇيلى جوعالىپ، بىرنەشە ايدان سوڭ ءولى دەنەسى تابىلعان 18 جاستاعى نازەركە ءارىپتىڭ ولىمىنە قاتىسى بار كۇدىكتى ۇستالدى، دەر حابارلايدى Qamshy.kz اقپارات اگەنتتىگى.

كۇدىكتى الماتى وبلىسى تالعار اۋدانىنىڭ 1984 جىلعى تۇرعىنى. بۇل تۋرالى الماتى قالاسى ءىىد قىلمىستىق پوليسيا باسقارماسىنىڭ باستىعى، پودپولكوۆنيك جانبولات زيادين مالىمدەدى.

«مەدەۋ اۋداندىق ىشكى ىستەر باسقارماسى ارىپتەستەرىمەن بىرىگىپ قىلمىسكەرىدى انىقتاۋ، ونى ۇستاۋ جانە دالەلدەردى جيناۋ ءۇشىن جەدەل ىزدەستىرۋ شارالارى باستالعان. قازىرگى ۋاقىتتا كۇدىكتى ۋاقىتشا ۇستاۋ اباقتىسىنا قامالدى. ءارى ونىڭ تاكسيشى ەكەنى انىقتالدى»، – دەيدى جانبولات زيادين.

ءزياديننىڭ مالىمدەۋىنشە، جۇرگىزۋشى قىزدى الىپ كەتىپ، قورلاپ، كەيىننەن قىلقىندىرعان.

«قىلمىسىن جاسىرىپ قالۋ ماقساتىندا قىزدىڭ دەنەسىن زيراتتىڭ ماڭىنا اپارىر تاستاعان. كۇدىكتى كىناسىن مويىندادى. ادام ءولتىرۋ دەرەگى بويىنشا سوتقا دەيىنگى تەرگەۋ جۇرگىزىلىپ جاتىر»، – دەدى پودپولكوۆنيك.

ايتا كەتەيىك، 18 جاستاعى الماتىلىق نازەركە ءارىپ 10 ماۋسىمدا ساعات 16:00-دە ۇيىنەن شىعىپ، قايتا ورالماعان. تەك 6 قىركۇيەكتە قىزدىڭ ءولى دەنەسى كەڭسايداعى زيراتتىڭ ماڭىنان تابىلدى.