Air Astana كومپانياسى بورتسەرىگىنىڭ قازاق ءتىلىن بىلمەگەنىنە نارازالىعىن ءبىلدىرىپ، قازاق تىلىندە قىزمەت كورسەتۋىن تالاپ ەتكەن وعىز دوعان اتالمىش كومپانيادان ءوز كىناسىن مويىنداپ كەشىرىم سۇراۋىن جانە مورالدىق شىعىن رەتىندە 1 تەڭگە بەرۋىن تالاپ ەتىپ وتىر دەپ حابارلايدى Qamshy.kz اقپارات اگەنتتىگى Today.kz-كە سىلتەمە جاساپ. ازاماتتىق تالاپ الماتىنىڭ تۇركسىب اۋداندىق سوتىنا كەلىپ ءتۇستى.

 وعىز دوعاننىڭ ادۆوكاتى ابزال قۇسپان تالاپ تۋراسىندا ايتىپ بەردى.

«ءبىز Air Astana كومپانياسىنىڭ ءوز كىناسىن مويىنداۋىن، وعىز دوعاننان كەشىرىم سۇراۋىن تالاپ ەتەمىز. ءبىراق پروسەسسۋالدىق كودەكس بويىنشا تالاپتى وزگەرتە الامىز. ازىرشە تەك كەشىرىم سۇراۋىن عانا تالاپ ەتىپ وتىرمىز. مورالدىق شىعىن رەتىندە 1 تەڭگە كولەمىندە اقشا تالاپ ەتۋ ماسەلەسى قاراستىرىلۋدا» دەدى ابزال قۇسپان.

ايتا كەتەيىك، Air Astana وكىلدەرى سوتقا كەلمەدى. بۇعان دەيىن وعىز دوعاننىڭ ازاماتتىق تالابى باسقا سوتتىڭ قاراۋىندا بولدى.

«بۇل ءىس سۋديا امانتاي ۇلىنىڭ قاراۋىندا بولدى. ول ءىستى قابىلدادى، الايدا 4ء-شى قازاندا ادۆوكاتپەن جەكە تانىس ەكەنىن، ول ونىڭ كۋرستاسى ەكەنىن ايتىپ ىستەن باس تارتتى. 5ء-شى قازاندا ءىس ماعان تاپسىرىلدى. بۇعان دەيىن وعان دايىندىق جۇرگىزىلمەدى. بىردە-بىر سوت وتىرىسى بولمادى. ەكى جاقتى تاتۋلاستىرۋ ءۇشىن 16-شى قازاندا سوت وتىرىسى وتەدى. مۇمكىن ماسەلە بەيبىت تۇردە شەشىلەتىن شىعار. سونىمەن قاتار، بارلىق وتىنىشتەردى قاراۋ كەرەك» دەدى سۋديا نۇرجان قالىمجانوۆا.

ەستەرىڭىزگە سالا كەتەيىك، الەۋمەتتىك جەلىدە Air Astana كومپانياسى ۇشاعىنىڭ جولاۋشىسى وعىز دوعان بورتسەرىكتىڭ مەملەكەتتىك ءتىلدى بىلمەيتىنىن جانە قازاق تىلىندە قىزمەت كورسەتپەدى دەپ ايىپتاعان ۆيدەوسى تارالدى. وقيعا 14ء-شى تامىزدا بولدى.