مەملەكەت باسشىسى «استانا» حالىقارالىق قارجى ورتالىعىنىڭ باسقارۋشىسى قايرات كەلىمبەتوۆتى قابىلدادى، دەپ حابارلايدى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ.

كەزدەسۋدە ەلباسىعا الەمنىڭ ۇزدىك تاجىريبەلەرىن پايدالانۋ ارقىلى قۇرىلىپ جاتقان حالىقارالىق قارجى ورتالىعىن ىسكە قوسۋعا ازىرلىك جۇمىستارى جونىندە مالىمدەلدى.

قازاقستان پرەزيدەنتىنە 2018 جىلعى قاڭتاردا اشىلاتىن «استانا» حالىقارالىق قارجى ورتالىعىنىڭ تاۋەلسىز سوتى مەن حالىقارالىق اربيتراجدىق ورتالىقتىڭ نورماتيۆتىك قۇجاتتارىن دايىنداۋ جۇمىسى اياقتالعانى تۋرالى باياندالدى.

سونداي-اق، قايرات كەلىمبەتوۆ نۇرسۇلتان نازاربايەۆقا ورتالىقتى دامىتۋدىڭ نەگىزگى باعىتتارى جونىندە مالىمدەپ، «استانا» حالىقارالىق قارجى ورتالىعىنىڭ جوعارى تەحنولوگيالىق بيرجاسىن قۇرۋ بارىسى تۋرالى ايتتى.

«استانا» حالىقارالىق قارجى ورتالىعىنىڭ باسقارۋشىسى قازىرگى ۋاقىتتا شانحاي قور بيرجاسىمەن جانە Nasdaq Inc. كومپانياسىمەن قارجى ورتالىعىن ودان ءارى قالىپتاستىرۋعا جانە دامىتۋعا سەپتىگىن تيگىزەتىن كەلىسىمدەرگە قول قويىلعانىن اتاپ ءوتتى.

ەلباسى ۇسىنىلعان ەسەپتى نازارعا الىپ، ءبىرقاتار ناقتى تاپسىرما بەردى.