«اسىل ارنا» تەلەراديوكومپانياسىنىڭ قىزمەتكەرلەرى ءبىر كۇندىك جالاقىسىن «ۋاقىپ» كورپوراتيۆتىك قايىرىمدىلىق قورىنا» اۋداردى، — دەپ حابارلايدى Qamshy.kz اقپارات اگەنتتىگى.
«ۋاقىپ» كورپوراتيۆتىك قايىرىمدىلىق قورى — بۇل قازاقستانداعى ءتۇرلى الەۋمەتتىك جوبالاردى قولداۋمەن اينالىساتىن ۇيىم. ونىڭ قىزمەتى ءداستۇرلى قۇندىلىقتار مەن رۋحاني شارالاردى قولداۋعا، الەۋمەتتىك جوبالاردى، ءبىلىم بەرۋ باعىتىنداعى تاربيەلىك ءىس-شارالاردى قارجىلاندىرۋعا، سونداي-اق، ءدىن قىزمەتكەرلەرىنىڭ جۇمىسىنىڭ تيىمدىلىگىن ارتتىرۋعا جانە ءدىني ينستيتۋتتاردىڭ جۇمىسىنا قولداۋ كورسەتۋگە باعىتتالعان. سونىمەن قاتار، قورعا تۇسكەن قاراجات كومەككە ءزارۋ، مەيىرىمگە مۇقتاج جاندارعا قايىرىمدىلىق كورسەتۋگە جۇمسالادى.
سوندىقتان «اسىل ارنا» تەلەارناسىنىڭ ۇجىمى دا وسى يگى ىسكە العاشقىلاردىڭ ءبىرى بولىپ ات سالىسۋعا نيەت ءبىلدىرىپ، ءبىر كۇندىك جالاقىسىن اۋداردى. «اسىل ارنا» تەلەراديوكومپانياسىنىڭ باسشىسى مۇحامەدجان تازابەك مىرزانىڭ ايتۋى بويىنشا، بۇل يگى ىسكە، ءبىر جاعىنان، ازاماتتىق قوعام جانە ءدىن ىستەرى ءمينيسترى نۇرلان ەرمەكبايەۆ مىرزانىڭ دا امالى تۇرتكى بولعان. ارنا باسشىسى ءارتۇرلى الەۋمەتتىك جوبالاردىڭ ىسكە اسۋىنا جاعداي جاسايتىن مۇنداي مۇمكىندىككە ەشكىمنىڭ بەي-جاي قارامايتىنىن ايتا كەلە، مەملەكەت مۇددەسىن كوزدەگەن يگى باستاماعا قولداۋ كورسەتۋ — ءاربىر ازاماتتىڭ مىندەتى ەكەنىن اتاپ ءوتتى.
