"لاتىن الىپبيىنە قاتىستى جۇمىستاردا تىلگە جاناشىر ماماندار نازاردان تىس قالعان جوق". بۇگىن ق ر پارلامەنتى ءماجىلىسىنىڭ دەپۋتاتى بەيبىت مامرايەۆ لاتىن گرافيكاسىنداعى ءالىپبي نۇسقاسىنا بايلانىستى وسىنداي پىكىر ءبىلدىردى، دەپ Qamshy.kz اقپارات اگەنتتىگى قازاقپاراتقا سىلتەمە جاساپ  حابارلايدى.

«وسىدان ءبىر اي بۇرىن «مەملەكەتتىك ءتىلدىڭ لاتىن گرافيكاسىنداعى ءالىپبيىنىڭ ءبىرىڭعاي ستاندارتىن ەنگىزۋ ماسەلەلەرى تۋرالى» پارلامەنتتىك تىڭداۋدا لاتىن ءقارپىنىڭ العاشقى نۇسقاسى قاراستىرىلعان بولاتىن. سودان بەرى كوپ وزگەرىستەردى بايقاۋعا بولادى. ويتكەنى جۇزدەگەن ۇسىنىستار كەلىپ ءتۇسىپ جاتىر، وسى ورايدا بۇل ۇسىنىستاردى جۇمىس توبىنىڭ مۇشەلەرى ەگجەي-تەگجەيلى قاراستىرىپ، اپتانىڭ باسىندا ءالىپبيدىڭ ەكىنشى جوباسىن تانىستىردى. ارينە، بۇل نۇسقا بىرىنشىسىنە قاراعاندا دەڭگەيى جوعارى دەپ ويلايمىن»، - دەيدى بەيبىت مامرايەۆ. ونىڭ پايىمداۋىنشا، قازاقستاندا لاتىن الىپبيىنە كوشۋ پروسەسى قالىپتى جاعدايدا ءجۇرىپ جاتىر. سەبەبى بۇل باعىتتاعى شارالار كەشەندى تۇردە قامتىلۋدا. «اتاپ ايتقاندا، وسى سالانى تۇسىنەتىن، ءارى جاناشىر مامانداردىڭ بارلىعى وزدەرىنىڭ ۇسىنىستارىن بەرىپ جاتقانىن بىلەسىزدەر. جىلدىڭ اياعىنا دەيىن تاپسىرما بويىنشا ۋاقىت بار، ەندى عالىمدار مەن ماماندار تاعى دا بۇدان ارى جەتىلدىرەدى دەپ ويلايمىن. سوندىقتان بۇل ماسەلە كەشەندى جانە جۇيەلى تۇردە مۇقيات قارالۋى ءتيىس»، - دەپ تۇيىندەدى ءسوزىن دەپۋتات. بۇدان بۇرىن حابارلانعانداي، بيىلعى 9 قازاندا مەملەكەت باسشىسى نۇرسۇلتان نازاربايەۆ مەملەكەتتىك ءتىلدى لاتىن الىپبيىنە كوشىرۋ جوباسى بويىنشا جۇمىس توبىنىڭ مۇشەلەرىن قابىلدادى. جيىندا مەملەكەت باسشىسىنا قوعامدىق تالقىلاۋلار بارىسىندا كەلىپ تۇسكەن ۇسىنىستاردى ەسكەرە وتىرىپ ازىرلەنگەن قازاق ءتىلىنىڭ لاتىن قارپىنە نەگىزدەلگەن ءبىرىڭعاي ستاندارتىنىڭ جوباسى ۇسىنىلدى.

ەستەرىڭىزگە سالا كەتەيىك، بيىل ساۋىردە «ەگەمەن قازاقستان» رەسپۋبليكالىق گازەتىندە ق ر تۇڭعىش پرەزيدەنتى – ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» اتتى ماقالاسى شىققان بولاتىن. «2017 جىلدىڭ اياعىنا دەيىن عالىمداردىڭ كومەگىمەن، بارشا قوعام وكىلدەرىمەن اقىلداسا وتىرىپ، قازاق ءالىپبيىنىڭ جاڭا گرافيكاداعى ءبىرىڭعاي ستاندارتتى نۇسقاسىن قابىلداۋ كەرەك. 2018 جىلدان باستاپ جاڭا ءالىپبيدى ۇيرەتەتىن مامانداردى جانە ورتا مەكتەپتەرگە ارنالعان وقۋلىقتاردى دايىنداۋعا كىرىسۋىمىز قاجەت»، - دەلىنگەن ەلباسى ماقالاسىندا.