الماتى ىرگەسىندەگى «اسىل ارمان» تۇرعىن ءۇيىنىڭ 1 مىڭعا جۋىق تۇرعىنى سۋدىڭ قىمباتتىعىن ايتىپ شاعىمداندى، دەپ Qamshy.kz اقپارات اگەنتتىگى قازاقپاراتقا سىلتەمە جاساپ  حابارلايدى.

تۇرعىندار ءقازىر سۋىق سۋدىڭ تەكشە مەترىنە 118،7 تەڭگە تولەپ وتىر. قۇزىرلى ورگاندار 2018 جىلدان باستاپ كوممۋنالدىق تاريفتەردى تاعى قىمباتتاتپاق ويدا. سۋ باعاسى بۇل تۇرعىن ۇيدە جىلىنا ەكى رەت وسەدى ەكەن. مونوپوليستەر سۋىق سۋدىڭ ءتاريفىن 2018 جىلى - 143،7، 2019 جىلى - 152،7، 2020 جىلى - 162،2، ال، 2021 جىلى - 195،2 تەڭگەگە كوتەرمەكشى. ال، كارىز قۇبىرىمەن قالدىق سۋدى شىعارۋدىڭ باعاسى دا وسىلاي جىل سايىن ەسەلەنە بەرەدى. «ءۇيدى العانىمىزعا ەكى جارىم جىل بولدى وسى ەكى جارىم جىلدىڭ ىشىندە اي سايىن تاريف وسەدى. بۇل ەندى قالاي؟ سول سەبەپتەن، مىنە، بۇگىن جينالىس بولىپ جاتىر. قايتادان تاريف كوتەرىلەدى دەيدى. ءبىز ءقازىر تەك قانا تاريفقا جۇمىس ىستەيمىز»، - دەدى ءۇيدىڭ تۇرعىنى الما كەنجەبايەۆا. ونىڭ ايتۋىنشا، سوڭعى ەكى جىلدا تاريف كولەمى بىرنەشە رەت كوتەرىلگەنىمەن، قىزمەت كورسەتۋ ساپاسى جاقسارعان ەمەس. جەكە كومپانيا باسشىلارى قىمباتشىلىقتىڭ نەگىزگى سەبەبىن تەڭگە باعامىنىڭ قۇبىلۋىمەن بايلانىستىرىپ وتىر.

«وبلىستىق مەكەمەلەر قاراپ سول ءتيىستى ينفلياسيا كوەففيسەنتىنە عانا كوبەيەتىن نارسە عوي. مىسالى، مۇعالىمدەردىڭ ايلىعىن ءوسىرىپ جاتىر ما، دارىگەردىڭ ايلىعىن نەدەن ءوسىرىپ جاتىر. سول ينفلياسياعا بايلانىستى ءوسىرىلىپ جاتقان جۇمىستار عوي. بىزدە دە سونداي ەسەپتەرمەن جاسالىپ جاتقان جۇمىستار»، - دەپ «الاتاۋ كومسەرۆيس» كومپانياسىنىڭ ديرەكتورى ەرسايىن ەشەكەنوۆ پىكىر ءبىلدىردى. مونوپولياعا قارسى كۇرەس باسقارماسىنىڭ وكىلدەرى تۇرعىنداردىڭ شاعىمى بويىنشا تەكسەرۋ جۇمىستارىن ەندى باستاعاندىعىن مالىمدەدى. ناتيجەسىن الداعى ۋاقىتتا كورەتىن بولامىز.