ەلىمىزدە قىزۋ تالقىعا ءتۇسىپ جاتقان لاتىن الىپبيىنە كوشۋ ماسەلەسى جونىندە بىرنەشە قوعام قايراتكەرلەرى مەن زيالى قاۋىم وكىلدەرى وزدەرىنىڭ پىكىرلەرىن ءبىلدىردى، دەپ حابارلايدى Qamshy.kz اقپارات اگەنتتىگى.
ەڭبەك ارداگەرى اسىلمۇرات تۇرعانبەكوۆ:
«9 قازانداعى اقوردادا وتكەن جينالىس ويداعىداي ءوتتى دەپ ويلايمىن، سەبەبى ءالىپبيدى ودان ءارى جەتىلدىرۋ بويىنشا ويلار تىڭدالىپ ديگرافتاردىڭ ورنىنا اپوستروفپەن جازۋعا توقتالعاندىعىمىز دۇرىس دەپ ساناپ، ونى تولىقتاي قولدايمىن.»
مەن ءوزىم 1940 جىلى تۋىلعانمىن، تۋۋ تۋرالى كۋالىگىمدە ءاتى-جونىم لاتىن الىپبيىمەن جازىلعان. وعان كوشۋدىڭ ساياسي، مادەني جانە تاريحي رولدەرىنىڭ ماڭىزى زور. بۇل جاڭعىرۋدىڭ ۇلكەن ءبىر تىرەگى، باستاۋى بولىپ تابىلادى. بارلىعى الىپبيىدەن باستالىپ، ءتىلىمىز تازارىپ، ءوسىپ ونەدى، سەبەبى بۇل ءبىزدىڭ ءتول ءالىپبيىمىز بولىپ تابىلادى. ۇلتتىق قۇندىلىعىمىزدى نىق بەكىتەتىن قادام.
ق ر ءبىرىنشى ءانۇرانىنىڭ اۆتورى، جازۋشى جادىرا دارىبايەۆا:
«كۇنى بۇرىن اقوردادا وتكەن جينالىس ناتيجەلى بولدى دەپ سانايمىن. الدىنعى نۇسقاعا قاراعاندا كەشەگىسى جەڭىلدەۋ، وڭاي قابىلدانادى جانە جازىلادى. سەبەبى ەكى نەمەسە ءۇش ارىپتەن ءبىر دىبىس بەرۋ قيىن سوعادى، ال ەندى ءوز باستاۋىمىزدى ساقتاي وتىرىپ ءبىر دىبىستان ءبىر ءارىپ شىعارامىز. بۇل شەشىمدى تولىقتاي قولداپ، لاتىن الىپبيىنە كوشۋ العا نىق باساتىن قادام بولاتىندىعىنا شىن جۇرەكتەن سەنەمىن.»
پروفەسسور، فيلولوگيا عىلىمدارىنىڭ دوكتورى ايگۇل ءىسماقوۆا:
«بۇل كۇندەرى قازاق ءتىلىنىڭ جاڭا الىپبيىنە بايلانىستى ماسەلە قوعامدا قىزۋ تالقىلانۋدا. ەلباسىمەن كەزدەسكەن عالىمدار ا. بايتۇرسىنوۆ اتىنداعى ءتىل ءبىلىمى ينستيتۋتىنىڭ دايىنداعان جوباسىن ۇسىندى. بۇدان بۇرىن ۇسىنعان 25 ارىپتەن تۇراتىن 3 تاڭبالى ءالىپبي قيىنداۋ بولىپ كەلسە، كەشەسى ۇسىنعان نۇسقا ەڭ قولايلى جانە كوپشىلىكتىڭ ويىنان شىعادى. عالىم رەتىندە بۇل وزگەرىستى تولىعىمەن قولدايمىن.
دەگەنمەن، تۇتاستاي العاندا ءالىپبي جوباسىندا ءالى دە ويلاناتىن، ساراپقا سالىپ، تاجىريبەدەن وتكىزىپ بارىپ قولدانىسقا ەنگىزەتىن تۇستار بار.
سونىمەن بىرگە، ەش اسىعىستىق تانىتپاي قازاق ءالىپبيىن لاتىن قارپىنە كوشىرۋ ۇدەرىسىنە قاتىستى ءاقپاراتتىق-تۇسىندىرۋ جۇمىستارىن جالعاستىرۋ قاجەت دەپ ەسەپتەمىن.»
