ەرلان كارين نۇرسۇلتان نازاربايەۆتىڭ سوچيدە تمد ەلدەرىنىڭ باسشىلارى قاتىسقان سامميتتە تۇسىرىلگەن اق-قارا سۋرەتى بەينەلەنگەن فۋتبولكا كيدى. بۇل تۋرالى Qamshy.kz اقپاراتتىق اگەنتتىگى Sputnik سايتىنا سىلتەمە بەرىپ جازادى.

قازاقستاندىق ساياساتكەر ەرلان كارين نازاربايەۆتىڭ جەلىنى شۋلاتقان ايگىلى فوتوسى بەينەلەنگەن كيىم كيدى. ونىڭ كەۋدەسىندە ارمەنيا پرەزيدەنتىنىڭ جەكە فوتوگرافى داۆيد اكوپيان تۇسىرگەن اق-قارا سۋرەت بار.  

بۇل ەلباسىنىڭ سۇلباسىنا عانا جارىق تۇسكەن سۋرەت Wise Power حەشتەگىمەن جاريالاندى. اعىلشىن تىلىنەن اۋدارعاندا بۇل تىركەس «پاراسات كۇشى» دەگەن ماعىنانى بىلدىرەدى.

جەلى قولدانۋشىلارى كاريننىڭ وسىلاي تەز ارادا ارەكەت ەتۋ ەپتىلىگىنە تاڭدانۋدا.

«الەمدىك ساياساتتا جۇمساق كۇش (Soft power) جانە اقىلدى كۇش (Smart Power)  دەگەن تۇسىنىكتەر بار. ال ەرلان كارين بولسا پاراسات كۇشى (Wise Power) دەگەن تىركەستى ويلاپ تاپتى. بۇل سوچيدەگى سۋرەتتىڭ ەڭ مىقتى انىقتاماسى»،- دەپ سامات نۇرتازا ءوزىنىڭ پاراقشاسىنا جازدى.

ەستەرىڭىزگە سالا كەتەيىك، 11 قازاندا داۆيد اكوپيان نازاربايەۆتىڭ سۋرەتىن جاريالاعان بولاتىن. سۋرەت نۇرسۇلتان نازاربايەۆتىڭ سوچيدەگى تمد ەلدەرى باسشىلارىنىڭ كەزدەسۋىندە تۇسىرىلگەن ەدى.

ەرلان كارين پرەزيدەنت سۋرەتىنە العاشقىلاردىڭ ءبىرى بولىپ باعاسىن بەردى.

كارين جەلى قولدانۋشىلارىنان: «قازىرگى كەزدە بارلىق اقپاراتتىق قۇرالدار ەلباسىنىڭ تانىمال سۋرەتىن جاريالادى، ايتىڭىزدارشى سىزدەردى وسى سۋرەت نەلىكتەن قىزىقتىرادى؟»،- دەپ سۇرادى.

كوپشىلىك بۇل فوتوداعى نازاربايەۆتى «كرەستنىي وتەس» فيلمىندەگى دون كارلەونمەن جانە «كارتوچنىي دوميك» تەلەحيكاياسىنداعى فرەنسيس اندەرۆۋدپەن سالىستىردى.

كاريننىڭ ارەكەتىن باسقا دا قازاقستاندىقتار قايتالاعىسى كەلەدى. الەۋمەتتىك جەلى قولدانۋشىلارى جەيدەنى قاي جەردەن ساتىپ الۋعا بولاتىندىعىن سۇراستىرۋدا.