كۇنى كەشە قايرات نۇرتاس پەن جۇلدىز ابدىكارىموۆا باستى ءرولدى سومداعان «ارمان/كوگدا انگەلى سپيات» كينوكارتيناسى ۇلكەن ەكرانعا جول تارتتى. قايرات پەن جۇلدىز بۇل جولى ءفيلمدى استانالىق كورەرمەندەرمەن بىرگە تاماشالادى.

بۇل تۋرالى Today.kz باسىلىمىنا سۇيەنە وتىرىپ، Qamshy.kz اقپارات اگەنتتىگى حابارلايدى.

فيلم باستالماس بۇرىن قايرات نۇرتاس ءتۇسىرىلىم بارىسى تۋرالى ءسوز ەتتى.

“بۇل فيلمدە اجەپتەۋىر ەسەيگەن قايراتپىن. مەن وتباسىلى ادامنىڭ ءرولىن سومدادىم. وسى ءفيلمنىڭ جارىققا شىعۋىن اسىعا كۇتتىك، ونىڭ ماعىناسى تەرەڭ. جالپى ويىنىمىزعا كوڭىلىم تولادى. تاعى بىرنەشە فيلمگە تۇسسەك، اكتەرلىك قابىلەتىمىز شىڭدالا تۇسەدى دەپ ويلايمىن. ءفيلمنىڭ سەنارييى كۇردەلى. ءبىراق جۇلدىزدىڭ ارقاسىندا ءساتتى شىقتى دەپ ويلايمىن. توسەك قاتىناسى بار كورىنىستە جارىمنىڭ ورنىن دۋبلەر الماستىردى. جالپى ۇدايى جارىمنىڭ جانىندا بولىپ، وعان كومەك بەرۋگە تىرىستىم»، – دەپ اتاپ ءوتتى نۇرتاس.

بۇدان وزگە، قايرات اكتەر اتانسا دا، ءان ايتۋدى تاستامايتىنىن اتاپ ءوتتى.

فيلم ارمان اتتى بويجەتكەن مەن ونىڭ سۇيىكتىسى تۋرالى اڭگىمەلەيدى. تويعا دايىندىق بارىسىندا 4 بىردەي ماس ەركەك ارماندى الىپ قاشىپ، زورلايدى. مۇنى بىلگەن قۇرمان سۇيىكتىسىن قۇتقارماق بولىپ، كەلەڭسىز جايتقا تاپ بولادى. ءتىپتى، تۇرمەگە تۇسەدى. ءوز كەزەگىندە زورلاۋشىلار بولعان جايتتى قۇپيادا ساقتاۋ ءۇشىن ارمانعا اقشا ۇسىنادى. الايدا بويجەتكەن ادىلدىكتىڭ ورناعانىن قالايدى.

ەسكە سالا كەتەيىك، 9-قازان كۇنى قايرات نۇرتاس «ارمان/كوگدا انگەلى سپيات» ءفيلمىنىڭ تۇساۋىن كەسىپ، العاش رەت جارى جۇلدىزدى ەل الدىنا الىپ شىقتى.