استانا جانە الماتىدا كاسىبي ستاندارتتاردى دايىنداۋدىڭ جاڭا ادىستەمەسىن وقىتۋعا ارنالعان ءىس-شارالار ۇيىمداستىرىلدى. وسىنىڭ ارقاسىندا 70-تەن اسا ستاندارت دايىنداۋشى مامان ترەنينگتەردەن جانە سەرتيفيكاسيادان ءوتتى دەپ حابارلايدى Qamshy.kz اقپارات اگەنتتىگى.

ادىستەمەنى قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگى جۇزەگە اسىرىپ جاتقان «ەڭبەك داعدىلارىن دامىتۋ جانە جۇمىس ورىندارىن ىنتالاندىرۋ» جوباسى اياسىندا Ernst & Young كومپانياسى دايىندادى. 2020 جىلدىڭ ماۋسىمىنا دەيىن 550 كاسىبي ستاندارتتى دايىنداپ، بەكىتۋ جوسپارلانىپ وتىر.

ادىستەمەنى تالقىلاۋعا قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگىنىڭ، «اتامەكەن» ۇلتتىق كاسىپكەرلەر پالاتاسىنىڭ، ءبىلىم بەرۋ ۇيىمدارى مەن جۇمىس بەرۋشىلەر قاۋىمداستىقتارنىڭ وكىلدەرى قاتىسىپ، وسىنىڭ ناتيجەسىندە كاسىبي ستاندارت قۇرىلىمىن جانە دە ونى دايىنداۋ مەن ماقۇلداۋدىڭ ءراسىمىن سيپاتتايتىن كەشەندى تاسىلدەمە قالىپتاستىرىلدى. ستاندارتتاردى دايىنداۋ جۇمىسىنا ءتيىستى كاسىپتەردىڭ جۇمىسشىلارى، جۇمىس بەرۋشىلەر، سونداي-اق، ءبىلىم بەرۋ مەكەمەلەرىنىڭ، سالالىق قاۋىمداستىقتاردىڭ، زەرتتەۋشى ۇيىمدار مەن مەملەكەتتىك ورگانداردىڭ وكىلدەرى، تاۋەلسىز ساراپشىلار مەن كەڭەس بەرۋشىلەر تارتىلاتىن بولادى. ال جۇمىستى ۇيلەستىرۋمەن وقىتۋ مەن سەرتيفيكاسيادان وتكەن ستاندارت دايىنداۋشى ماماندار اينالىسادى.

«كاسىبي ستاندارتتار ۇلتتىق بىلىكتىلىكتەر جۇيەسىنىڭ اجىراماس بولىگى بولىپ تابىلادى. بۇل ستاندارتتار مەملەكەتكە جۇمىسشىلاردى وقىتۋ، سونداي-اق، ءبىلىم بەرۋ مەكەمەلەرىندە، ءارتۇرلى كۋرستاردا، سونداي-اق، تىكەلەي ەڭبەك قىزمەتى كەزىندە ۇيرەنگەن رەسمي جانە بەيرەسمي داعدىلاردى مويىنداۋ سىندى ماقساتتاردى جۇزەگە اسىرۋعا كومەكتەسپەك. كاسىبي ستاندارتتار مەن بىلىكتىلىكتەر جۇيەسىن ەندىرۋ ناتيجەسىندە ەڭبەك نارىعى سۇرانىسقا يە كادرلارمەن تولىعاتىن بولادى»، - دەپ اتاپ ءوتتى قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگى ەڭبەك جانە الەۋمەتتىك سەرىكتەستىك دەپارتامەنتىنىڭ ديرەكتورى نۇركەن تىلەۋوۆ.

سەرتيفيكاسيادان وتكەن ستاندارت دايىنداۋشى ماماندار كاسىبي ستاندارتتاردى دايىنداۋعا ۇستىمىزدەگى جىلى كىرىسكەلى وتىر. وسى رەتتە بۇل ستاندارتتار ۇدايى وزگەرىستەردەن ءوتىپ وتىرادى: قۇزىرەتتى ۇيىمدار ەڭ كەم دەگەندە ءۇش جىلدا ءبىر رەت ولاردى قايتا قاراستىرىپ، جاڭارتىپ وتىرادى. ءوندىرىستىڭ ۇيىمداستىرىلۋى، ونىڭ ەرەكشەلىكتەرى مەن قۇرىلىمىنىڭ وزگەرۋى، سونداي-اق، ەڭبەك فۋنكسيالارىنىڭ، قۇزىرەتتىلىكتەر مەن بىلىكتىلىكتەر مازمۇنىنىڭ وزگەرۋىنە اكەلەتىن جاڭا تەحنولوگيالاردى ەندىرۋ سىندى جاعدايلار دايىندالعان ستاندارتتاردى قايتا قاراستىرۋعا جانە اۋىستىرۋعا سەبەپ بولادى.