ۋكراينانىڭ حمەلنيسكيي قالاسىنداعى مەكتەپتەردە ەندى ورىس ءتىلى وقىتىلمايدى، دەپ Qamshy.kz اقپارات اگەنتتىگى Baq.kz سايتىنا سىلتەمە جاساپ حابارلايدى.  

«دۇيسەنبىدەن باستاپ حمەلنيسكييدە ورىس ءتىلىن وقىتاتىن بىردە-بىر مەكتەپ جانە سىنىپ بولمايدى»،-دەلىنگەن مالەمدەمەدە. باسقا مالىمەتتەر كورسەتىلمەگەن. حمەلنيسكيي قالالىق كەڭەسىنىڭ ءبىلىم بەرۋ دەپارتامەنتىندە قالا مەكتەپتەرىندە ورىس ءتىلى وقىتىلمايتىنىن راستادى.

«حمەلنيسكييدە جالپى ءبىلىم بەرەتىن مەكەمەلەردە ورىس ءتىلىن وقىتۋدان باس تارتقاندىعىمىزدى راستايمىن. شىنىندا دا بۇل قالا باسشىسىنىڭ ۇستانىمى بولدى. ءارى اتا-انالاردىڭ دا قالاۋى، ولار بۇنى ءتيىستى وتىنىشپەن راستادى»، - دەگەن ديرەكتور دەپارتامەنتى رومان مىكولايۆ.

سونىمەن قاتار ول ورىس ءتىلىن وقىتپاۋ تۋرالى شەشىم قالالىق كەڭەستە داۋىس بەرۋ جولىمەن ەمەس، دەپارتامەنت قابىلداعانىن ايتتى. مىكولايۆ ورىس ءتىلىن تەك اتا-انالار تالاپ ەتكەندە عانا وقىتاتىنىن ايتقان، ءبىراق ەكى جاعدايدا عانا.

«تەك ورىس ءتىلىن عانا ەمەس، روم، ۆەنگر ءتىلىن وقىعىسى كەلەتىندەر بولۋى مۇمكىن. مۇنداي جاعدايدا ولار ءوتىنىش جازا الادى. سونىمەن قاتار لايىقتى كادر بولۋى جانە كەلىپ تۇسكەن ءوتىنىش 12 وقۋشىدان كەم بولماۋى كەرەك. مۇنداي جاعدايدا ءوتىنىشتى ورىندايمىز. بىزدە ورىس تىلىنەن فاكۋلتاتيۆتەر بار. ءبىراق ولاردى دا الىپ تاستاۋ قاجەت دەپ ويلايمىز»، - دەدى مىكولايۆ.

مىكولايۆتىڭ پىكىرىنشە، ورىس ءتىلىن وقىتپاۋ وقۋشىلاردىڭ قۇقىقتارىن شەكتەمەيدى، «كەرىسىنشە ورىس ءتىلىنىڭ كەسىرىنەن بولىپ جاتقان بوساڭسۋدان قۇتىلىپ، ۋكراينا مەملەكەتىنىڭ نىعايۋىنا كومەكتەسەدى». ونىڭ پىكىرىنشە، وقۋشىلار ورىس كلاسسيكتەرىن ءتۇپنۇسقادا وقي الادى، ويتكەنى تەليەۆيدەنيە مەن راديونىڭ باسىم كوپشىلىگى ورىس تىلىندە حابار تاراتادى. باسىلىمنىڭ مالىمەتىنشە، حمەلنيسكييدە جالپى 41 مەكتەپ بار.

قىركۇيەك ايىندا ۋكراينا پرەزيدەنتى ەلدەگى از ۇلتتىڭ تىلىندە ءبىلىم بەرۋدى قىسقارتۋ تۋرالى زاڭعا قول قويعان بولاتىن. ول 28 قىركۇيەكتەن باستاپ كۇشىنە ەندى. بۇل زاڭ كەزەڭ-كەزەڭىمەن 2020 جىلعا دەيىن قولدانىسقا ەنەتىن بولادى. بىرنەشە ەلدىڭ ۇكىمەتتەرىندە، سونىڭ ىشىندە ۆەنگريا مەن رۋمىنيادا  زاڭ ۋكرايناداعى از ۇلتتىڭ قۇقىقتارىن بۇزاتىنى ايتىلدى. ماسكەۋ دە ءبىلىم بەرۋ تۋرالى زاڭ كييەۆتىڭ كونستيتۋسياسى مەن حالىقارالىق مىندەتتەمەلەرىن بۇزادى دەپ سانايدى.