قىرعىزستاننىڭ ورتالىق سايلاۋ كوميسسياسى جاريالاعان سوڭعى مالىمەت بويىنشا 1 482 891 سايلاۋشىنىڭ داۋىسى ەسەپتەلىپ بولدى. رەسمي اقپاراتقا سايكەس كانديداتتاردىڭ ىشىندە ەڭ كوپ داۋىس جيناعان تورتتىكتى 54،04 پايىز قولداۋعا يە بولعان سوورونباي جەەنبەكوۆ باستاپ تۇر، دەپ Qamshy.kz اقپارات اگەنتتىگى ازاتتىققا سىلتەمە جاساپ حابارلايدى.

ەكىنشى ورىندا – سايلاۋشىلاردىڭ 33،65 پايىز داۋىسىن العان ومىربەك بابانوۆ. وپپوزيسيالىق ساياساتكەر اداحان مادۋماروۆ – 6،54 پايىز كورسەتكىشپەن ءۇشىنشى ورىندا. ءتورتىنشى ناتيجە يەلەنگەن تەمىر سارييەۆتىڭ ەنشىسىندە 2،5 پايىز داۋىس بار. مادۋماروۆتان باسقا قالعان ءۇش كانديدات كەزىندە پرەمەر-مينيستر قىزمەتىن اتقارعان. سايلاۋشىلاردىڭ 0،67 پايىزى بارلىق كانديداتتارعا قارسى داۋىس بەرگەن. پرەزيدەنت سايلاۋىنا جالپى سانى 11 كانديدات قاتىستىرىلدى.

قىرعىزستاننىڭ زاڭى بويىنشا پرەزيدەنت سايلاۋىنىڭ العاشقى تۋرىندا سايلاۋشىلاردىڭ جارتىسىنان استامىنىڭ داۋىسىن العان كانديدات بىردەن جەڭىمپاز دەپ جاريالانادى. جەەنبەكوۆ قىرعىزستاننىڭ وڭتۇستىگىندەگى وش وبلىسىندا 72،3 پايىز داۋىس جيناسا، ونىڭ باستى قارسىلاسى بابانوۆ سولتۇستىكتەگى تالاس وبلىسىندا 85 پايىز قولداۋعا يە بولعان.

قىرعىزستاننىڭ مەرزىمى اياقتالىپ جاتقان پرەزيدەنتى المازبەك اتامبايەۆ ءوزىنىڭ قول استىندا ۇكىمەت باسقارعان سوورونباي جەەنبەكوۆتى قولداپ كەلگەن بولاتىن. ال ومىربەك بابانوۆ سايلاۋ الدىندا قازاقستان پرەزيدەنتىمەن كەزدەسكەنى ءۇشىن اتامبايەۆتىڭ سىنىنا ۇشىراعان.