قىرعىزستان پرەزيدەنتى سايلاۋىندا الدا كەلە جاتقان ۇمىتكەر سوورونباي جەەنبەكوۆ داۋىس بەرۋ اياقتالعان سوڭ بىشكەكتە وتكەن باسپا ءسوز كونفەرەنسياسىندا قىرعىزستان مەن قازاقستان اراسىنداعى سوڭعى وقيعالارعا قاتىستى جۋرناليستەر سۇراعىنا جاۋاپ بەردى، دەپ Qamshy.kz اقپارات اگەنتتىگى ازاتتىققا سىلتەمە جاساپ حابارلايدى.
جەەنبەكوۆ مەملەكەتتەر بىر-بىرىنە "قۇرمەتپەن قاراۋى ءتيىس" ەكەنىن، سوندا عانا بارلىق ماسەلە وزدىگىنەن شەشىلە بەرەتىنىن ايتتى. "بۇل ۋاقىتشا نارسە، بۇل دا شەشىلەدى دەپ ويلايمىن" دەدى جەەنبەكوۆ.
"ءبىز بارلىعىنا قۇرمەتپەن قارايمىز، اسىرەسە كورشىلەرىمىزگە. وسى قارىم-قاتىناستى جالعاستىرا بەرەمىز.
"قازاقستان پرەزيدەنتى نۇرسۇلتان نازاربايەۆقا دەگەن كوزقاراسىڭىز قانداي؟" دەگەن ساۋالعا جەەنبەكوۆ "ول (نازاربايەۆ - رەد.) - ءبىزدىڭ كورشىلەس باۋىرلاس مەملەكەتتىڭ باسشىسى. ءبىز ىنتىماقتاستىق ورناتقان بارلىق مەملەكەتكە، پرەزيدەنتكە قۇرمەتپەن قارايمىز" دەدى.
قىرعىزستاننىڭ ورتالىق سايلاۋ كوميسسياسى جاريالاعان سوڭعى مالىمەت بويىنشا 1 482 891 سايلاۋشىنىڭ داۋىسى ەسەپتەلىپ بولدى. رەسمي اقپاراتقا سايكەس كانديداتتاردىڭ ىشىندە ەڭ كوپ داۋىس جيناعان تورتتىكتى 54،04 پايىز قولداۋعا يە بولعان سوورونباي جەەنبەكوۆ باستاپ تۇر. ەكىنشى ورىندا - سايلاۋشىلاردىڭ 33،65 پايىز داۋىسىن العان ومىربەك بابانوۆ. وپپوزيسيالىق ساياساتكەر اداحان مادۋماروۆ - 6،54 پايىز كورسەتكىشپەن ءۇشىنشى ورىندا. ءتورتىنشى ناتيجە يەلەنگەن تەمىر سارييەۆتىڭ ەنشىسىندە 2،5 پايىز داۋىس بار. مادۋماروۆتان باسقا قالعان ءۇش كانديدات كەزىندە پرەمەر-مينيستر قىزمەتىن اتقارعان. سايلاۋشىلاردىڭ 0،67 پايىزى بارلىق كانديداتتارعا قارسى داۋىس بەرگەن. پرەزيدەنت سايلاۋىنا جالپى سانى 11 كانديدات قاتىستىرىلدى.
قازاقستان مەن قىرعىزستان شەكاراسىندا 10 قازاننان بەرى تەكسەرۋ كۇشەيىپ، قازاقستانعا قاراي ءوتۋ قيىنداعان. ەكى ەل شەكاراسىنداعى وتكىزۋ بەكەتتەرىندە كەزەك پايدا بولعان. قىرعىزستان مەملەكەتتىك شەكارا قىزمەتىنىڭ سوڭعى مالىمەتى بويىنشا، شەكاراداعى جاعداي ءالى وڭالماي تۇر. كوپشىلىگى بۇل جاعدايدى قىرعىزستاننىڭ ءىس باسىنداعى پرەزيدەنتى المازبەك اتامبايەۆتىڭ 7 قازاندا قازاقستان بيلىگىنە قاراتا ايتقان سىنىمەن بايلانىستىرادى.
13 قازاندا اتامبايەۆ "3 مىڭ جىلدىق تاريحى بار حالىقتىڭ ءۇش كۇندىك بلوكادادان قورىقپايتىنىن" مالىمدەگەن. بىرەر كۇننەن سوڭ ول ەگەر قىرعىز-قازاق شەكاراسىنداعى جاعداي وزگەرمەسە ەۋرازيا ەكونوميكالىق وداعىنىڭ كەزەكتەن تىس جيىنىن شاقىرۋعا قۇقىعى بارىن ەسكەرتكەن.
