موگاديشودا بولعان جارىلىستىڭ سالدارىنان قازا تاپقانداردىڭ سانى 276-عا جەتتى، ال 300 ادام اۋىر جاراقات العان. بۇل جايىندا اقپارات ءمينيسترى ابديراحمان وسمان مالىمدەدى، دەپ حابارلايدى Qamshy.kz اقپارات اگەنتتىگى ريا نوۆوستي سايتىنا سىلتەمە جاساپ.

سەنبى كۇنى جارىلعىش زات تولى جۇك كولىگى موگاديشو كوشەلەرىنىڭ بىرىندە ادام كوپ جۇرەتىن جەردە جارىلعان بولاتىن. سالدارىنان 231 ادام قازا تاۋىپ، 245ء-ى اۋىر جاراقاتتاندى دەپ حابارلانعان بولاتىن.

«قازىرگى ۋاقىتتا قازا تاپقان ادامداردىڭ سانى 276-عا جەتىپ، 300 ادام اۋىر جاراقات العاندىعى بەلگىلى بولدى. شابۋىلدى «اش-شاباب» تەرروريستەر توبى ۇيىمداستىرعان»، - دەپ جازادى مينيستر ءوزىنىڭ الەۋمەتتىك جەلىدەگى پاراقشاسىندا.

سونىمەن قاتار، ەشبىر تەرروريستىك ۇيىم اتالمىش وقيعانى ءوز جاۋاپكەرشىلىگىنە الماعاندىعى بەلگىلى بولدى.

ءمينيستردىڭ ايتۋىنشا، دجيبۋتي، ەفيوپيا جانە كەنيا مەملەكەتتەرى اۋىر جاراقاتتانعاندارعا مەديسينالىق كومەك كورسەتۋدى ۇسىنعان. سونىمەن قاتار، انكارا سومالي بيلىگىنىڭ جاراقات العانداردى تۇركياعا ەمدەۋگە جىبەرۋ تۋرالى وتىنىشىنە جاۋاپ بەرگەن.