ەلىمىزدىڭ ەكى وبلىسىندا «قازمۇنايگاز» كومپانيالارىنىڭ جانارماي قۇيۋ بەكەتتەرىندە اي-92 بەنزينىن ەركىن ساتۋدا ءالى دە قيىندىقتار بايقالۋدا، دەپ حابارلايدى Qamshy.kz اقپارات اگەنتتىگى قازاقپاراتتىڭ مالىمەتىنە سۇيەنىپ.

«تولىقتاي العاندا «قازمۇنايگازدىڭ» جانارماي قۇيۋ بەكەتتەرىنە بەنزين جەتكىزۋ تۇراقتانىپ كەلەدى.  ەگەر وتكەن اپتانىڭ باسىندا تەك ءۇش وبلىستا عانا  مۇناي ونىمدەرىن ەركىن ساتۋعا مۇمكىندىك بولسا، قازىرگى ۋاقىتتا قازاقستاننىڭ 8 وڭىرىندە ونىمدەر ەركىن ساتىلىپ جاتىر. التى وڭىردە مۇناي ونىمدەرىن ەركىن، ءبىراق ءبىر قولعا 20 ليتردەن ارتىق ەمەس كولەمدە ساتۋعا مۇمكىندىك بەرەتىن كولەم بار»، - دەدى «قازمۇنايگاز ونىمدەرى» جشس-نىڭ دامۋ جونىندەگى باسقارۋشى ديرەكتورى باقىتجان تاسانبايەۆ  ب ا ق وكىلدەرىنە بەرگەن سۇحباتىندا.

ونىڭ ايتۋىنشا، وڭتۇستىك قازاقستان مەن اقمولا وبلىستارىندا بەنزين كارتامەن عانا بەرۋدە. دەگەنمەن، بۇل وڭىرلەرگە تاياۋ كۇندەرى جەتكىلىكتى كولەمدە بەنزين جەتكىزىلەتىن بولادى. سونىمەن قاتار ب.تاسانبايەۆتىڭ سوزىنە قاراعاندا، ەلوردادا بەنزين ەركىن ساتىلىپ جاتىر. اي-92 بەنزينىنىڭ 2 مىڭ توننادان استام قالدىعى بار.

بۇعان قوسا،  رەسەيدەن 2 مىڭ توننادان استام بەنزين يمپورتتالعان. جولدا شامامەن 800 توننا بەنزين كەلە جاتىر. تولىقتاي العاندا، قازىرگى ۋاقىتتا «قازمۇنايگازدىڭ» جانارماي قۇيۋ بەكەتتەرىندە 8-10 مىڭ توننا مۇناي ونىمدەرى بار.

«قازاقستان بويىنشا اي-92 بەنزينىنىڭ 12 مىڭ تونناسى جولدا كەلە جاتىر جانە اتالعان كەلىم جەتكىزىلگەننەن كەيىن ەركىن رەجيمدە ساتىلاتىن بولادى. بۇعان قوسا، قازىرگى ۋاقىتتا زاۋىتتاردىڭ بىرىندە جوندەۋ جۇمىستارىنىڭ جۇرگىزىلىپ جاتقانىن جانە يمپورتتىڭ قاجەت ەكەندىگىن ەسكەرە وتىرىپ،  «قازمۇنايگاز ونىمدەرى» رەسەيلىك بەنزيننىڭ 45 مىڭ تونناسىن يمپورتتاۋ تۋرالى شارت جاساستى. ونىڭ نەگىزگى بولىگى وسى اپتانىڭ ىشىندە جەتكىزىلەدى. جالپى، قازاقستاندىق جانە رەسەيلىك شامامەن 60 مىڭ توننا مۇناي ونىمدەرى جەتكىزىلەدى دەپ كۇتۋدەمىز»، - دەدى ول.