الاش اۆتونومياسى جانە الاشوردا ۇكىمەتىنىڭ 100 جىلدىعىنا ورايلاستىرىلعان شارا استانا قالاسىنىڭ اكىمدىگى، تىلدەردى دامىتۋ باسقارماسىنىڭ ۇيىمداستىرۋىمەن «بولاشاققا باعدار: رۋحاني جاڭعىرۋ» باعدارلاماسى اياسىندا وتپەك. كونفەرەنسيانىڭ ماقساتى: الاش اۆتونومياسىنىڭ، الاشوردا ۇكىمەتىنىڭ، «الاش» پارتياسىنىڭ يدەيالارىن جانە ەلدى تاۋەلسىزدىك مۇراتىنا ۇيىستىرعان الاش ارىستارىنىڭ مۇرالارىن ناسيحاتتاۋ، مەملەكەت تاريحىن كوپشىلىككە دارىپتەۋ، پاتريوتتىق قوعامدى قالىپتاستىرۋ.

القالى جيىن بارىسىندا 1917 جىلعى جالپى قوعامدىق-ساياسي جاعداي؛ الاشوردا كوسەمدەرىنىڭ قىزمەتى؛ الاش رەنەسسانسى جانە ۇلتتىق رۋحاني جاڭعىرۋ تاقىرىپتارى بويىنشا بايانداما جاسالىپ، ەلباسى العا تارتقان «رۋحاني جاڭعىرۋ» يدەياسى مەن الاشتىڭ نەگىزگى ۇستانىمدارى اراسىنداعى  ساباقتاستىق كورسەتىلەتىن بولادى. 

كونفەرەنسيانىڭ جۇمىسىنا  بەلگىلى الاشتانۋشىلار، عالىمدار، قالامگەرلەر، دەپۋتاتتار، مەملەكەتتىك مەكەمەلەردىڭ، ساياسي پارتيالاردىڭ، مۋزەي-كىتاپحانالاردىڭ، ۇكىمەتتىك ەمەس ۇيىمدار مەن جاستار قوعامدىق بىرلەستىكتەرىنىڭ، وقۋ ورىندارى مەن مەكتەپتەردىڭ جانە بۇقارالىق اقپارات قۇرالدارىنىڭ جەتەكشىلەرى مەن وكىلدەرى، جاس عالىمدار مەن ماماندار، وقىتۋشىلار مەن ستۋدەنتتەر قاتىسادى دەپ كۇتىلۋدە.